شەتەلدىك اقپارات كوزدەرى سولتۇستىك كورەيانىڭ ەڭ جوعارى باسشىسى كيم جوڭ ۋن (كيم چەن ىن/Kim Jong Un) قۇراما شتات پرەزيدەنتى ترامپقا حات جولداعانىن حابارلاعان ەدى. حاباردا حاتتىڭ وڭتۇستىك كورەيانىڭ پيوڭياڭعا (Pyongyang/پحەنيان) كەلگەن رەسمي وكىلىنە تابىستالعانى ايتىلعان. الەمنىڭ ىقپالدى مەديا وكىلدەرى، سولتۇستىك كورەيا بۇل حاتتا ءوزىنىڭ يادرولىق باعدارلاماسى تۋرالى سويلەسۋلەرگە دايىن ەكەنىن ايتقان دەگەن بولجامدار جاسايدى.

وڭتۇستىك كورەيانىڭ باق وكىلدەرى، ەلدىڭ بىرنەشە ءمينيسترى  بەيسەنبى كۇنى ۋاشينگتونعا (ۆاشينگتون) ساپارلاي بارعالى جاتقانىن حابارلاۋدا. قحدر-عا رەسمي ساپارمەن بارعان وڭتۇستىك كورەيانىڭ ۇلتتىق قاۋىپسىزدىك كەڭەسشىسى چون ي ەن كيم جوڭ ۋننىڭ حاتىن اقش پرەزيدەنتى دونالد ترامپقا جەتكىزىپ بەرمەكشى. چون ي ەن جۋرناليستەرگە جاساعان مالىمدەمەسىندە، كيم جوڭ ۋنمەن كەزدەسۋدە ءسوز بولعان تاقىرىپتىڭ ءبارىن اشىپ بەرە المايتىنىن ءبىلدىردى. دەگەنمەن كحدر-نىڭ كوزقاراستارىن اقش-پەن بولىسۋگە دايىن ەكەنىن ايتتى.

وسىدان بۇرىن اقش مەملەكەتتىك دەپارتامەنتى "سولتۇستىك كورەياعا تاريحتاعى ەڭ قاتال سانكتسيانى جاريالايمىز" دەپ مالىمدەگەن. ۋاشينگتون تارابى بۇل سانكتسيانى پيوڭياڭ اگەنتتەرىنىڭ مالايزياداعى اۋەجايدا كيم جوڭ نامدى ۋلاپ ولتىرگەنى ءۇشىن سالعانىن ايتقان.

2003 جىلى سولتۇستىك كورەيا يادرولىق باعدارلامانى توقتاتۋ كەلىسىمىنەن شىعىپ كەتكەننەن كەيىن، بۇل ەلمەن وتكىزگەن بىرنەشە رەتكى كەلىسسوز ءساتسىز اياقتالعان. وسىدان كەيىن كحدر ارت-ارتىنان يادرولىق سىناقتار مەن بالليستيكالىق زىمىران سىناقتارىن وتكىزدى. ەكسپەرتتەردىڭ مالىمدەۋىنشە سولتۇستىك كورەيادا 20 دانا اتوم قارۋى بار جانە قۋاتتى سۋتەگى بومباسىن جاساپ شىعارۋعا تىرىسىپ جاتىر. وعان قوسا وتكەن جىلى سولتۇستىك كورەيا قۇرلىق ارالىق بالليستيكالىق زىمىران سىناقتارىندا جوعارى ناتيجەگە قول جەتكىزدى.

جىل باسىندا كيم جوڭ ۋن «يادرولىق ساندىقتى ۇستەلىنىڭ ۇستىنە قويىپ قويعانىن» ايتقان. وسىدان كەيىن اقش بارلاۋ اگەنتتەرى كيم جوڭ ۋن تۋرالى جاڭا مالىمەتتەردى تاراتىپ، ونىڭ جۇرت ويلاعانداي «ەسەرسوق» ادام ەمەس ەكەنىن، كحدر بولاشاعىن يادرولىق باعدارلامامەن تىكەلەي بايلانىستىرعان كۇندە دە سىرتقى دۇنيەمەن كەلىسىمگە كەلۋ نيەتىنىڭ دە بار ەكەنىن ايتقان. دەگەنمەن، كيم جوڭ ۋننىڭ ترامپقا جازعان قۇپيا حاتىندا نە ايتىلعانى قازىرگە دەيىن انىق ەمەس. حات ترامپقا جەتكەننەن كەيىن ونى اقش پرەزيدەنتى جۇرتقا اشىپ كورسەتە مە، جوق، بۇل دا بەيمالىم. قالايدا، سولتۇستىك كورەيا ءوز بولاشاعى ءۇشىن ۇلكەن ءبىر قادام جاساپ، يادرولىق قارۋىن بەتكە ۇستاعان ديپلوماتيالىق جولعا تۇسكەنىن كورىپ وتىرمىز.

“The Qazaq Times”