بارلىق قازاقستاندىقتارعا بەلگىلى بولعانداي، وتانداسىمىز ديماش قۇدايبەرگەنوۆ قىتايدا ءوتىپ جاتقان «ءانشى» جوباسىنىڭ بەتاشار تاراتىلىمىندا جوعارى ناتيجە كورسەتتى. العاشقى ورىنداعان انىمەن-اق ءبىر كۇندە تانىمال جۇلدىزعا اينالىپ شىعا كەلدى. سايتىمىز العاش بولىپ، ونىڭ ءبىرىنشى ءتۇسىرىلىمىن قازاقستان جۇرتشىلىعىنا جەتكىزدى.  بارلىق قازاقستاندىقتارمەن بىرگە، جوبانىڭ ەكىنشى اينالىمىن اپتا بويى اسىعا كۇتتىك.

قىتاي حۋنان پروۆينتسياسىنىڭ تەلەكانالىندا تاراتىلىپ جاتقان جوبانىڭ ەكىنشى اينالىمى بۇگىن بەيجىڭ ۋاقىتىمەن 22:15 مولشەرىندە باستالدى. (استانا ۋاقىتىمەن 20:15) كەزەكتى ءان باسەكەسىنەن بۇرىن، ديماش تۋرالى ارنايى بەينە سيۋجەت تاراتتى. وندا ديماشتىڭ جوباداعى جارقىن جۇلدىز ەكەنىن انىق كورسەتىپتى. العاشقى اينالىمنىڭ التىن بەلگىسىن العان ديماشتىڭ، اتا-اناسىنا، وتباسىنا بۇل قۋانىشىن ونلاين قوڭىراۋ ارقىلى جەتكىزگەنىن دە نازارىنان قاعىس قالدىرماپتى. ءبىرىنشى اينالىم اياقتالعاننان كەيىنگى، كۇتۋ بولمەسىنە التىن بەلگى الىپ كىرگەن ديماشتى ارىپتەستەرىنىڭ قۇشاق جايا قارسى العانىن بايقادىق.

ەكىنشى اينالىمدا ديماشتىڭ الدىن-الا دايىنداعان ءانى رۇقساتسىز تاراتىلىپ كەتكەندىكتەن، وعان جاڭا انگە دايىندالۋ تاپسىرىلىپتى. جوبادا ديماشپەن جۇمىس جاساعان ماماندار وعان ۆيتاستسىڭ «وپەرا 2» ءانىن سىناپ كورۋگە ۇسىنىس بەرگەن. ال ديماش بولسا بۇل انگە ءوزىنىڭ بۇرىننان سىرالعى ەكەنىن، ءتىپتى ۆيتاستان ەكى دىبىس جوعارى ايتا الاتىنىن جەتكىزگەندە، قىتاي مامانداردىڭ ەسى شىعىپ كەتسە كەرەك.  سونىمەن ەكىنشى اينالىمعا ديماشتىڭ ورىنداۋىنداعى «وپەرا 2» ءانى تاعى ءبىر مارتە قىتايدى سىلكىپ الىپتى.

ءتىپتى، ول داۋىسىن بىرتە بىرتە جوعارىعا كوتەرىپ، اۋەزىن اۋەدە قالىقتاتقانداي ۇستاپ تۇرعاندا، قىتايلىق كورەرمەندەر ورنىنان ورە تۇرىپ، بارماقتارىن كورسەتتى. ءسۇيىنىش پەن تاڭدانىس ولاردىڭ جۇزىنەن ايقىن ءبىلىنىپ تۇردى. بۇل جولى ديماشتىڭ ءانىن كورەرمەندەر اراسىندا اكەسى قانات ايتباەۆ تا تىڭدادى. ۇلىنا رازى بولعان اكەنىڭ جۇزىندە ماقتانىش پەن ءسۇيىنىش قاتار بىلىنەدى.

ايتا كەتەيىك،  ۆيتاس «وپەرا 2» انىمەن كوپ جىل بۇرىن قىتايعا ەڭ تانىمال شەتەلدىك ونەرجۇلدىزى بولىپ ەدى. ديماشتىڭ انىنەن كەيىن ولار ۆيتاستى ۇمىتىپ كەتۋى ابدەن مۇمكىن.

جارايسىڭ ديماش!

“The Qazaq Times”