تۇركيا دەربەس وندىرگەن MRT-76 اۆتوماتى. فوتو: PressTV.

تۇركيا مەن ناتو اراسى سالقىنداعاننان كەيىن، انكارا بيلىگى وتاندىق اسكەري ءوندىرىستى دامىتىپ جاتقانىن بىلەمىز. ءبىر كۇن بۇرىن تۇركيا ءوزىنىڭ تۇڭعىش رەت دەربەس جاساپ شىعارعان «MRT-76» اۆتوماتىن افريندەگى اسكەرلەرىنە جىبەرىپ بەردى. بۇل تۋرالى سول ەلدىڭ «انادولى» اقپارات اگەنتتىگىنىڭ رەسمي سايتى حابارلاعان ەدى.

تۇركيانىڭ تۇڭعىش وتاندىق اۆتومات قارۋىن ماشينا جانە حيميا زەرتتەۋ-ءوندىرۋ ورتالىعىنا قاراستى «كىرىكالە» قارۋ-جاراق زاۋىتى جاساپ شىعارعان. ءسۇريانىڭ افرين ايماعىندا سوعىس سالىپ جۇرگەن تۇركيا اسكەرلەرىنە 4500 دانا «MRT-76» اۆتوماتى جىبەرىلدى.

كىرىكالەدە اۆتوماتتاردى تۇركيا قۇرلىق كۇشتەرىنە تابىستاۋ ءراسىمى ءوتتى. فوتو: انادولى.

تۇركيا قارۋلى كۇشتەرى جانە قارۋ ءوندىرۋشى وكىلدەرى «MRT-76» اۆتوماتتارىنىڭ اسكەرلەرگە جونەلتۋ ءراسىمىن سالتاناتتى وتكىزگەن. ايتالىق، «MRT-76»  اۆتوماتتارىن قۇرلىق كۇشتەرىنىڭ قولباسشىلىق شتابىنا تاپسىرىپ بەرۋ ءۇشىن دۇعا وقىپ، ءدىني راسىمدەردى دە اتقارعان.

حاباردا كىرىكالە قارۋ-جاراق زاۋىتى قازىر دە ءوندىرىستى ەڭ جوعارى قارقىنمەن جۇرگىزىپ جاتقانى ايتىلعان. اتالعان قارۋ ءوندىرۋشى ورىنعا «MRT-76» اۆتوماتىنان 20 مىڭ داناسىن وندىرۋگە بۇيرىق بەرگەن ەكەن. ولار بۇل مىندەتتى مامىر ايىنا دەيىن ورىنداپ بولاتىنىن ايتادى. قازىرگە دەيىن 11 مىڭ اۆتومات دايىن.

“The Qazaq Times”