فوتو: bbc.com

اقش پرەزيدەنتى دونالد ترامپ شۆەيتساريادا وتكەن بۇكىلالەمدىك ەكونوميكالىق فورۋمدا "امەريكا ءبىرىنشى، ونىڭ ساياساتى  جالعىز ەكەنىن بىلدىرمەيدى" دەپ مالىمدەدى. ول ءوزىنىڭ سايلاۋالدى كامپانياسى كەزىندە امەريكاداعى جەرگىلىكتى كاسىپكەرلىكتى شەتەلدىك باسەكەلەستىكتەن قورعاۋعا ۋادە بەرگەن بولاتىن. بۇل ساياسات جاھاندانۋ مەن ءوزارا ارىپتەستىكتى ۇران ەتكەن بۇكىلالەمدىك ەكونوميكالىق فورۋمنىڭ نەگىزگى قاعيدالارىنا قايشى كەلەدى. دەگەنمەن اقش پرەزيدەنتى ءوز مەملەكەتىنىڭ كاسىپكەرلىك جاساۋعا اشىق بولىپ قالا بەرەتىنىن اتاپ ءوتتى. 

دونالد ترامپ ءوزىنىڭ امەريكا پرەزيدەنتى قىزمەتىندە وتكىزگەن ءبىر جىلىندا قول جەتكىزگەن جەتىستىكتەردى سانامالاپ، كورپوراتيۆتى سالىقتىڭ تومەندەگەنىن جانە جۇمىسسىزدىق ۇلەسىنىڭ ازايعانىن العا تارتتى. ول: "جۇمىس ورىندارىن قۇرۋ، ءوسۋ مەن ينۆەستيتسيالار سالۋ ءۇشىن امەريكا ەشقاشان ءدال مۇنداي قولايلى بولعان ەمەس. ءبىز كاسىپكەرلىك ءۇشىن اشىقپىز!", - دەپ مالىمدەدى.

ۆۆس ءتىلشىسى "دونالد ترامپتىڭ "امەريكا ءبىرىنشى، بىراق جالعىز ەمەس" دەۋى، ونىڭ پروتەكتسيونيزم ساياساتى اياسىندا وزگە الەم مەملەكەتتەرىمەن ساۋدا سوعىسىن باستاۋ ەمەس، ءادىل ساۋدا جۇرگىزۋگە شاقىرۋ" دەگەن قورىتىندى شىعارادى. دەگەنمەن جاقىن كۇندەرى اقش-تىڭ ەلگە يمپورتتالاتىن كىر جۋاتىن ماشينالار مەن كۇن پانەلدەرىنە قويىلاتىن ءتاريفتى 50 پايىزعا دەيىن كوتەرۋ تۋرالى شەشىمى وڭتۇستىك كورەيا مەن قىتايدىڭ نارازىلىعىن تۋدىرعان ەدى.

“The Qazaq Times"