تۇركيا سۇرياداعى اسكەري وپەراتسياسىن كۇشەيتەدى

تۇركيا سۇرياداعى كۇرد جاساقتارىنا قارسى اسكەري وپەراتسياسىن كۇشەيتەتىنىن حابارلادى. رەجەپ تايىپ ەردوعان شەكارا قاۋىپسىزدىگىن قامتاماسىز ەتۋ ءۇشىن تۇركيادا "تەرروريستىك ۇيىم" دەپ تانىلعان كۇردتەردىڭ YPG ۇيىمىنا قارسى باستاعان اسكەري وپەراتسيانىڭ جەتىنشى كۇنىندە ءسۇريانىڭ مانبيج (Manbij) قالاسىن ازات ەتۋگە ۋادە بەردى. اقش-تىڭ اسكەرى ءدال وسى قالادا بولعاندىقتان، تۇركيا مەن كۇردتەرگە قارسى اسكەري قيمىلداردى ايىپتاعان امەريكا اراسىنداعى قارىم-قاتىناس كۇردەلەنە ءتۇستى. 

وسىدان بۇرىن تۇركيا اسكەري وپەراتسيانى "سوڭعى تەرروردىڭ كوزى جويىلعانشا" جالعاستىراتىنىن حابارلاعان بولاتىن. تۇركيانىڭ سىرتقى ىستەر ءمينيسترى مەۆليۋت چاۆۋشوعلى تۇرىك اسكەرلەرى افرين ايماعىن كۇردتەردىڭ قولىنان ازات ەتكەنىمەن، ونى وككۋپاتسيالامايتىنىن، ءوڭىردى شىنايى يەلەرىنە قايتارىپ بەرەتىنىن ايتتى.

تۇركيا پرەزيدەنتى رەجەپ تايىپ ەردوعان مەن اقش-تىڭ مەملەكەتتىك باسشىسى دونالد ترامپ تەلەفون ارقىلى سويلەستى. ۋاشينگتون مەن انكارا تەلەفون قوڭىراۋىنىڭ  بارىسىن ەكى ءتۇرلى جەتكىزدى. اقش دونالد ترامپتىڭ تۇركياعا اسكەري وپەراتسياسىن شەكتەۋ تۋرالى ەسكەرتۋ جاساعانىن ايتسا، رەدجەپ تايىپ ەردوعاننىڭ اكىمشىلىگى بۇل مالىمدەمەنى جوققا شىعاردى.

رەجەپ تايىپ ەردوعان اقش پەن وزگە باتىس مەملەكەتتەرىنىڭ "اسكەري وپەراتسيانى قىسقارتۋ كەرەك، ۋاقىتىن ۇزارتپاي توقتاتقان دۇرىس" دەگەن سوزىنە: "اۋعانستانداعى اسكەري وپەراتسيا قانشا جىلعا سوزىلدى؟ شامامەن 20 جىلداي ۋاقىت. ال يراك شە؟ 18 جىل!", - دەپ جاۋاپ بەردى.

“The Qazaq Times”