فوتو: AFP

الەمدەگى 57 مۇسىلمان مەملەكەت اقش-تىڭ يەرۋساليمدى ءيزرايلدىڭ استاناسى دەپ مويىنداۋ تۋرالى شەشىمىن زاڭسىز دەپ تاۋىپ، شىعىس يەرۋساليمدى پالەستينانىڭ ورتالىعى دەپ تانۋدى تالاپ ەتتى. وسىدان بۇرىن پالەستينانىڭ پرەزيدەنتى ماحمۇد ابباس بۇۇ-دان ماسەلەنىڭ شەشىمىن ءوز قولىنا الۋدى سۇراعان بولاتىن. بۇل تۋرالى ۆۆس اقپاراتتىق اگەنتتىگى جازدى. 

يسلام ىنتىماقتاستىعى ۇيىمىنىڭ باس قوسۋىندا ماحمۇد ابباس اقش ءيزرايلدى قولدايتىنىن اشىق كورسەتكەننەن باستاپ، تاياۋ شىعىستاعى بەيبىت كەلىسىمدەردە مەدياتور قىزمەتىن اتقارا المايتىنىن ايتتى. "پالەستينالىقتار ترامپتىڭ اكىمشىلىگىمەن "عاسىر كەلىسىمىنە" قول جەتكىزۋ ءۇشىن سەنىم ارتىپ، ناتيجەسىندە امەريكادان "عاسىر شاپالاعىن" الدى", -دەدى ول.

تۇركيا پرەزيدەنتى رەجەپ تايىپ ەردوعان مۇسىلمان مەملەكەتتەرىندە دونالد ترامپتىڭ شەشىمىنە قارسى بولىپ وتكەن كوتەرىلىستەردى اتاپ ءوتىپ، يسلام ىنتىماقتاستىق ۇيىمىنىڭ جيىنى اقش-تى توقتاتۋعا جاسالعان قادامدى كۇشەيتۋدىڭ امالى ەكەنىن ايتتى.

ۆۆس ءتىلشىسىنىڭ پىكىرىنشە، ساۋد ارابياسى مەن ەگيپەت سياقتى مەملەكەتتەر يسلام ىنتىماقتاستىعى ۇيىمىنىڭ جيىنىنا ءوز وكىلدەرىن اقش-تى قولداۋ ءۇشىن عانا جىبەرگەن. ءيزرايلدىڭ پرەمەر-ءمينيسترى بەنجامين نەتانياحۋ تاياۋ شىعىستاعى بەيبىت كەلىسىمدەردە اقش-تىڭ ورنىن باساتىن ەشكىم جوق ەكەنىن ايتىپ، ۋاقىتى كەلگەندە بارلىق مەملەكەتتەر اقيقاتتى مويىنداپ، ءوز ەلشىلىكتەرىن يەرۋساليمگە كوشىرەتىنىنە سەنىم ءبىلدىردى. ول سونداي-اق، پالەستينالىقتاردان شىندىقتىڭ بەتىنە تۋرا قاراپ، ەكسترەميزمدەن اۋلاق بولۋدى، بەيبىتشىلىكتى قولداۋدى ءوتىندى.

“The Qazaq Times”