بۇۇ سولتۇستىك كورەياعا ءوزىنىڭ وكىلى دجەففري فەلتماندى رەسمي ساپارمەن جىبەردى. وتكەن اپتادا پيوڭياڭ (پحەنيان) ءوزىنىڭ كەزەكتى ءىرى زىمىران سىناعىن وتكىزگەننەن كەيىن، وعان جاۋاپ رەتىندە اقش پەن وڭتۇستىك كورەيا باستاعان اسكەري جاتتىعۋلار كورەي جارتىتۇبەگىندەگى جاعدايدى ونان ءارى شيەلەنىستىرە ءتۇستى. كحدر باسشىسى كيم جوڭ ۋن تاراپىنان قاتاڭ سىنعا ۇشىراعان اسكەري جاتتىعۋلار مەن سولتۇستىك كورەيانىڭ يادرولىق قارۋ باعدارلاماسى بۇۇ وكىلى تالقىلايتىن نەگىزگى تاقىرىپتاردىڭ ءبىرى بولادى. 

دجەففري فەلتمان ءوزى وسى قىزمەتكە تاعايىندالعان بەس جىلدىق ەڭبەك ءوتىلى كەزىندە العاش رەت سولتۇستىك كورەياعا ساپار شەگىپ وتىر. ول كحدر-دا سەيسەنبىدەن جۇماعا دەيىن بولادى. اقش پەن وڭتۇستىك كورەيانىڭ 230 ۇشاق پەن F-22 Raptor stealth جويعىشتارىنىڭ قاتىسۋىمەن وتەتىن اسكەري جاتتىعۋلارى بەس كۇنگە سوزىلادى دەپ جوسپارلانعان.

بۇۇ باس حاتشىسىنىڭ ساياسي ماسەلەلەر جونىندەگى  ورىنباسارى دجەففري فەلتمان سولتۇستىك كورەياعا ونىڭ ەڭ جاقىن وداقتاستارىنىڭ ءبىرى قىتايدان اتتانادى. بۇۇ قىزمەتكەرى ستەفان دۋحاريك دجەففري فەلتماننىڭ كحدر پرەزيدەنتى كيم جوڭ ۋنمەن كەزدەسەتىنى بەلگىسىز ەكەنىن حابارلادى. سولتۇستىك كورەياعا ارنايى ميسسيامەن باراتىن وكىل ونداعى بۇۇ-نىڭ گۋمانيتارلىق باعىتتاعى قىزمەتكەرلەرى جانە شەتەلدىك ديپلوماتتارىمەن كەزدەسەدى.

“The Qazaq Times”