فوتو: Getty Images

اقش سولتۇستىك كورەيانىڭ سوڭعى بالليستيكالىق زىمىران سىناعىنان كەيىن بارلىق مەملەكەتتەردى پحەنيانمەن ديپلوماتيالىق جانە ساۋدا بايلانىستارىن ءبىرجولا ۇزۋگە شاقىردى. ەرەكشە ەسكەرتۋگە تاعى دا قىتاي ىلىكتى. ۋاشينگتون ءوزىنىڭ ازيالىق ارىپتەسىنەن سولتۇستىك كورەياعا مۇناي تاسىمالداۋىن توقتاتۋدى تالاپ ەتىپ وتىر. بۇل تۋرالى ۆۆس  اقپاراتتىق اگەنتتىگى جازدى. 

بۇۇ-نىڭ قاۋىپسىزدىك كەڭەسىندە سويلەگەن سوزىندە امەريكانىڭ ەلشىسى نيككي حەيلي: "قىتاي قازىرگىدەن دە كوبىرەك كۇش سالۋى كەرەك. ءبىز بەيجىڭ سولتۇستىك كورەياعا مۇناي تاسىمالىن توقتاتۋى كەرەك دەگەن شەشىمگە كەلدىك. بۇل تۋرالى پرەزيدەنت شي جيڭ پيڭمەن تەلەفون ارقىلى اڭگىمە بارىسىندا تالقىلادى", -دەدى.

دونالد ترامپتىڭ قىتاي باسشىسىمەن تەلەفون جەلىسىندە سويلەسكەنى تۋرالى اق ءۇي دە ارنايى مالىمدەمە  جاسادى. وندا "امەريكا پرەزيدەنتى ءوز ارىپتەسىنەن سولتۇستىك كورەيانىڭ پروۆوكاتسيادان باس تارتىپ، دەنۋكلەريزاتسياعا (قارۋسىزدانۋ) باعىت الۋى ءۇشىن قولىندا بار بارلىق تەتىكتەردى پايدالانۋىن سۇرادى" دەلىنگەن.

دونالد ترامپ ءوزىنىڭ تۆيتتەر پاراقشاسىندا: "قازىر عانا شي جينپيڭ مىرزامەن سويلەستىم. سولتۇستىك كورەياعا قارسى قوسىمشا سانكتسيالار بۇگىننەن باستاپ كۇشىنە ەنەدى. بۇل ماسەلە كوپ ۇزاماي شەشىلەدى" دەپ جازدى.

شينحۋا اقپاراتتىق اگەنتتىگى شي جينپيڭ  دونالد ترامپقا: "پەكيننىڭ ماقساتى سولتۇستىك-شىعىس ازيانىڭ تىنىشتىعى مەن تۇراقتىلىعىن قامتاماسىز ەتۋ جانە سولتۇستىك كورەيانىڭ يادرولىق قارۋدان  باس تارتۋىنا ىقپال ەتۋ" ەكەندىگىن حابارلادى دەپ جازدى.

“The Qazaq Times”