روحيندجا مۇسىلماندارى ميانماعا قايتادى

بانگلادەش مەن بيرما تامىز ايىندا بولعان قاندى قاقتىعىستان كەيىن باس ساۋعالاپ بوسقىندار لاگەرىن پانالاعان روحيندجا مۇسىلماندارىن تۋعان ەلىنە قايتارۋ تۋرالى كەلىسىمگە قول قويدى. بۇۇ-نىڭ مالىمەتىنشە 25 تامىزدان بەرى بانگلادەشتىڭ جاعالاۋىنداعى لاگەرلەرگە قونىس اۋدارعانداردىڭ سانى - 620 مىڭ ادام. بۇل تۋرالى APF اقپاراتتىق اگەنتتىگى جازدى. 

ميانمانىڭ كوشباسشىلارىنىڭ ءبىرى، الەمدىك قاۋىمداستىقتىڭ قاتاڭ سىنىنا ۇشىراعان بەيبىتشىلىك سالاسىنداعى نوبەل سىيلىعىنىڭ لاۋرەاتى اۋنگ سان سۋ چجي مەن بانگلادەشتىڭ سىرتقى ىستەر ءمينيسترى ماحمۇد ءالي روحيندجا مۇسىلماندارىن راكحاين ايماعىنا قايتارۋ تۋرالى كەلىسىمگە قول قويدى. الداعى ءۇش اپتا ىشىندە رەپاترياتسيانىڭ نەگىزگى شارتتارىن قۇرۋ ءۇشىن ارنايى جۇمىس توبى قۇرىلادى. ەكى ايدان كەيىن بوسقىندار لاگەرىن پانالاعان ەتنيكالىق قاقتىعىس قۇرباندارىن ەلىنە قايتارۋ پروتسەسى باستالادى دەپ كۇتىلۋدە.

بوسقىنداردى قابىلداعانى ءۇشىن الەم تاراپىنان ماراپات پەن العىسقا بولەنگەن بانگلادەش سوڭعى ۋاقىتتا روحيندجا مۇسىلماندارىنىڭ ەلدەن كەتكەنىن قالايتىنىن ءبىلدىردى. ويتكەنى لىق تولى لاگەرلەر تەك گۋمانيتارلىق كومەك ەسەبىنەن كۇن كورىپ وتىر. يۋنيسەف-تىڭ حابارلاۋىنشا، بوسقىندار لاگەرىندە 25 مىڭعا جۋىق بالا ازىق-تۇلىك جەتىسپەۋشىلىگىنەن زارداپ شەگىپ وتىر. اشتىق پەن ىندەتتىڭ تارالۋ قاۋپى جوعارى مەكەندى پانالاۋعا كەلگەن روحيندجالىقتار بيرما بيلىگىنەن كورگەن تەپەرىشتەرى مەن زورلىق-زومبىلىق فاكتىلەرىن جۋرناليستەرگە جايىپ سالدى. ءوز كەزەگىندە بيرما بيلىگى تەك مەملەكەتتىك كۇشتەرگە قارسى شىققان باسقىنشى توپ وكىلدەرىن عانا جازالاعانىن ايتادى.

ميانماعا ارنايى ساپارمەن بارعان اقش-تىڭ مەملەكەتتىك حاتشىسى رەكس تيللەرسون دا روحيندجا مۇسىلماندارىنا قارسى جاسالعان ارەكەتتەردى "ەتنيكالىق تازارتۋ" فاكتىسى دەپ تاۋىپ، ايىپتاعان بولاتىن.

ەۋرووداقتىڭ باس ديپلوماتى فەدەريكا موگەريني وسى اپتانىڭ باسىندا ميانماعا ساپارىنان كەيىن، رەپاترياتسيا بويىنشا كەلىسىمنىڭ قابىلدانعانىن قولداپ، روحيندجا مۇسىلماندارىنىڭ وتانىنا ورالۋى قاۋىپسىز بولۋىن قاداعالاۋ كەرەكتىگىن ەسكەرتتى. ازىرگە قانشا مۇسىلماننىڭ قانداي ۋاقىت ارالىعىندا ميانماعا ورالاتىنى بەلگىسىز.

ميانمادا ازاماتتىق بەرىلمەستەن ءومىر ءسۇرىپ كەلگەن روحيندجالىقتار بيرما بيلىگى مەملەكەتتىڭ وزگە تۇرعىندارىمەن تەڭ قۇقىلى ازاماتتىق بەرمەسە، وتاندارىنا ورالۋدان باس تارتاتىندارىن جەتكىزدى. ولار ميانماعا بوسقىندار لاگەرىن پانالاۋ ءۇشىن قايتا بارعىلارى كەلمەيدى. كوپ جىلدار بويى بۋدديستەر باسىم ايماقتا "بيرما ازاماتى" دەگەن تولقۇجاتقا قول جەتكىزە الماي كەلگەن مۇسىلماندار تۋعان جەرلەرىنە تولىق قۇقىلى ازاماتتار بولىپ قانا قايتاتىندارىن ايتتى.

“The Qazaq Times”