كۋبا سولتۇستىك كورەيانىڭ وداقتاسى بولۋعا دايىن

كۋبا سولتۇستىك كورەيانىڭ از وداقتاستارىنىڭ ءبىرى رەتىندە ۋاشينگتون-پيوڭياڭ قارىم-قاتىناستارىنىڭ جاقسارعانىن قالايتىنىن ءبىلدىردى. گاۆانادا ءوزىنىڭ سولتۇستىك كورەيالىق ارىپتەسى ري يوڭ حونى قابىلداعان كۋبانىڭ سىرتقى ىستەر ءمينيسترى برۋنو رودريگەس ءوز مەملەكەتىنىڭ بەيبىتشىلىك پەن تۇراقتىلىقتى قولدايتىنىن، ال وعان تەك كەلىسسوزدەر جانە دۇرىس قابىلدانعان ساياسي شەشىمدەر ارقىلى عانا قول جەتكىزۋگە بولاتىنىن اتاپ ءوتتى. بۇل تۋرالى APF اقپاراتتىق اگەنتتىگى جازدى. 

برۋنو رودريگەس وسى اپتانىڭ باسىندا دونالد ترامپتىڭ "سولتۇستىك كورەيا تەرروريزمدى قارجىلاندىرىپ وتىر" دەگەن مالىمدەمەسىمەن كەلىسپەيتىنىن ءبىلدىردى. "بۇل تەك اقش-تىڭ عانا كوزقاراسى، بىرجاقتى پىكىر جانە بۇل نەگىزسىز مالىمدەمەلەر سولتۇستىك كورەياعا دەگەن امەريكانىڭ وكتەمدىگىن ارتتىرىپ،  حالىقارالىق زاڭدارعا قايشى كەلەدى", - دەدى ول.

سونداي-اق كۋبانىڭ رەسمي وكىلى كورەي جارتىتۇبەگىندە يمپەرياليستىك اسكەري كۇشتىڭ ءجيى قولدانىلۋىن سىنادى. "يمپەرياليستىك اسكەري كۇش" دەپ برۋنو رودريگەس اقش، وڭتۇستىك كورەيا مەن جاپونيانىڭ بىرلەسكەن اسكەري جاتتىعۋلارىن اتاپ وتىر. باس ديپلومات سوتسياليزم جۇيەسىن ۇستانىپ وتىرعان كۋبا مەن سولتۇستىك كورەيانىڭ قارىم-قاتىناسى اسا ماڭىزدى ەكەنىنە توقتالدى.

اقش پەن سولتۇستىك كورەيانىڭ بۇرىننان سالقىن قارىم-قاتىناستارى پيوڭياڭنىڭ بالليستيكالىق زىمىراندار سىناعىن دوعارماۋى جانە وعان جاۋاپ رەتىندە بۇۇ سانكتسيالار ەنگىزۋى ارقىلى ۋشىعىپ وتىر. ال كۋبا مەن اقش اراسىنداعى 50 جىلعا ۇزىلگەن ديپلوماتيالىق بايلانىستار باراك وبامانىڭ تۇسىندا قايتا جاندانعانىمەن، دونالد ترامپ اكىمشىلىگىنىڭ بيلىككە كەلۋىمەن،  كۇردەلەنە ءتۇستى.

“The Qazaq Times”