اقش پەن رەسەي «يسلام مەملەكەتى» ۇيىمىنا قارسى كۇش بىرىكتىرۋى مۇمكىن

اقش پەن رەسەي "يسلام مەملەكەتى" لاڭكەستىك ۇيىمى تولىقتاي جەڭىلگەنشە، وعان قارسى كۇش بىرىكتىرىپ، كۇرەس جۇرگىزۋ تۋرالى كەلىسىمگە كەلدى. كرەملدىڭ جاساعان مالىمدەمەسىندە اتالعان شەشىم ۆەتنامدا ءوتىپ جاتقان ازيا-تىنىق مۇحيت سامميتىندەگى قوس ەل باسشىسىنىڭ كەزدەسۋى كەزىندە قابىلدانعانى ايتىلعان. اقش تاراپى بۇل مالىمدەمەگە قاتىستى ءالى پىكىر بىلدىرگەن جوق. بۇل تۋرالى ۆۆس اقپاراتتىق اگەنتتىگى جازدى. 

كەزدەسۋ ورنىنان بايانداما جاساعان ساراپشىلاردىڭ سوزىنە سايكەس، قوس ەل باسشىسى 24 ساعات ىشىندە 3 رەت شاعىن اڭگىمەگە باس قوسقان. دونالد ترامپ پرەزيدەنتتىككە سايلانعالى بەرى ولار گامبۋرگتە وتكەن G20 سامميتىندەگى كەزدەسۋلەرىنەن سوڭ ەكىنشى رەت كەزدەسىپ وتىر. اقش-رەسەي پرەزيدەنتتەرىنىڭ ۆەتنامداعى ەكونوميكالىق فورۋمدا كەزدەسۋىن الەم اسىعا كۇتتى.

كرەمل بايانداماسىندا اقش پەن رەسەي سۇرياداعى جاعدايدىڭ اسكەري شەشىمى جوقتىعىمەن كەلىسىپ، جەنەۆاداعا كەلىسسوزدەرگە بارلىق تاراپتاردى قاتىستىرۋعا تىرىساتىندىقتارىن جەتكىزدى. رەسەيدىڭ ينتەرفاكس اگەنتتىگىنىڭ حابارلاۋىنشا، اقش پەن رەسەي "يسلام مەملەكەتى" لاڭكەستىك ۇيىمىن جەڭۋ ءۇشىن ارىپتەستىك بايلانىستارىن نىعايتۋ تۋرالى ءسوز قوزعاعان.

ەستەرىڭىزگە سالا كەتەيىك، رەسەي التى جىلدان بەرى سۇرياداعى بيلىكتىڭ قولداۋشىسى بولىپ وتىر. ال اقش اراب توپتارى مەن كۇرد اسكەري وداعىنا كومەكتەسىپ، 2014 جىلدان بەرى اۋەدەن بومبالاۋ وپەراتسياسىن جۇرگىزىپ كەلەدى.

“The Qazaq Times”