فوتو: antimaidan.ru

2017 جىلى الەمدە ماقساتتى تۇردە جاسالعان شابۋىلدان  30 جۋرناليست وتىرىلگەن. بۇل تۋرالى "2 قاراشا - جۋرناليستەرگە قارسى جاسالعان قىلمىستاردى جازاسىز قالدىرماۋ حالىقارالىق كۇنىنە" بايلانىستى بۇۇ-نىڭ ارنايى بايانداماشىلارى حابارلاعان.

«بيىل الەمدە ماقساتتى تۇردە جاسالعان شابۋىلداردان 30 جۋرناليست قازا تاپتى»، -دەلىنگەن بۇۇ-نىڭ سوتتان تىس جازا كەسۋ جونىندەگى ارنايى بايانداماشىسى اگنەس كەلامار مەن ارنايى بوستاندىق قۇقىعىن قورعاۋ جونىندەگى بايانداماشىسى دەۆيد كەيدىڭ مالىمدەمەسىندە.

سپيكەرلەر "باق وكىلدەرىنە جاسالعان شابۋىل - دەموكراتيالىق قۇقىققا قول سۇعۋ" دەگەن پىكىر ايتادى. كەلامار مەن كەيدىڭ سوزىنشە، تىم ءجيى قۋدالاناتىندار سىبايلاس جەمقورلىقتى توقتاتۋعا كومەكتەسەتىن جانە بيلىكتى سىنايتىن جۋرناليستىك زەرتتەۋمەن اينالىسىپ جۇرگەن باق وكىلدەرى مەن بلوگەرلەر ەكەن.

وسىلايشا قۇقىق قورعاۋشىلار باق وكىلدەرىنە قارسى جاسالعان بارلىق قىلمىستاردى تاۋەلسىز جانە ءادىل تەرگەۋگە شاقىرىپ وتىر. ولار كەيبىر زاڭسىزدىقتار جاڭا قىلمىستاردىڭ تۋىنداۋىنا اكەپ سوعاتىنىن ەسكەرتۋدە. ءتىپتى بۇۇ ساراپشىلارى مۇنداي قىلمىستىق ارەكەتتەر جۋرناليستەردى "جەك كورەتىن" كەيبىر جوعارى لاۋازىمدى شەنەۋنىكتەردىڭ دە قولدارىنان كەلەتىنىن ايتادى.

ايتا كەتەيىك، بۇۇ وكىلدەرى ايتقانداي  جۋرناليستەرگە قاتىستى قىلمىستىق ىستەر قازاقستاندا جوق ەمەس. الايدا بىزدە بۇدان گورى ءسوز بوستاندىعىن تالاپ ەتكەن جۋرناليستەر كوپ قىسىم كورەدى.

“The Qazaq Times”