فوتو:wesa.fm.

يران جاق اقش بەكىتكەن جاڭا سانكتسيالار ارقىلى يادرولىق كەلىسىمدى بۇزدى دەپ ايىپتادى. يراننىڭ ءماجىلىس توراعاسى الي لاريدجاني اقش-تىڭ جاڭا سانكتسياسى يرانمەن جاساسقان يادرولىق كەلىسىمنىڭ كەيبىر تارماقتارىن ءبۇلدىردى دەپ كورسەتتى. سونداي-اق، وسى جونىندە بۇۇ قاۋىپسىزدىك كەڭەسىنە شاعىم جولدادى. بۇل تۋرالى «تۇرىك-تەلەراديو» قىزمەتىنىڭ رەسمي سايتى حابارلادى.

يران مەن 5+1 ەلدەرى اراسىندا 2015 جىلى جاساسقان كەلىسىمدە يران يادرولىق باعدارلاماسىنا بايلانىستى كوپتەگەن شارتتاردى قابىلداعان بولاتىن. بۇل كەلىسىمنىڭ ءبىر ماقساتى يرانعا سالىنعان سانكتسيالاردى الىپ تاستاۋدى كوزدەگەن ەدى. بۇل سول كەزدە قالىپتاسقالى تۇرعان يران داعدارىسىن سەيىلتكەن بولاتىن. بيلىك باسىنا كەلگەن حاسان رۋحانيدىڭ ديپلوماتيانى جانداندىرۋ ساياساتىنان كەيىن، يران ءوزىنىڭ جەدەل دامىتۋدى كوزدەگەن يادرولىق باعدارلاماسىن توقتاتتى. الايدا، يران جاق وسى رەتكى جاڭا سانكتسيا 2015 جىلعى كەلىسىم تالاپتارىنا قايشى كەلەدى دەپ ايىپتادى.

ترامپ اقش پرەزيدەنتتىگىنە كەلگەننەن كەيىن اقش-تىڭ ورتا-شىعىستاعى  ساياساتىندا بىرقاتار جاڭا وزگەرىستەر كەلدى. ترامپ باستان اياق يرانمەن جاساسقان يادرولىق كەلىسىم وسى ەلدىڭ يادرولىق قۋاتىن تەجەۋگە جەتكىلىكسىز دەپ قاراپ كەلدى. ال، شىلدە ايىنىڭ سوڭىندا اقش بەكىتكەن جاڭا سانكتسيادا يراننىڭ التى ءىرى كومپانياسىنا بىردەي شەكتەۋ قويدى. ونداعى العا تارتقان سەبەبى يران بالليستيكالىق زىمىراندارىنىڭ سالماعى ارتۋى دەپ كورسەتتى. بۇل الداعى ۋاقىتتا يراندى يادرولىق باعدارلامانى قايتالاي جۇزەگە اسىرۋعا يتەرمەلەۋى مۇمكىن. سەبەبى، «ۇلكەن بەستىك»-پەن جاساسقان كەلىسىمنەن كەيىن دە وزىنە سانكتسيا سالىنعانىن العا تارتىپ، يادرولىق باعدارلامالارىن تەجەۋدەن باس تارتۋى مۇمكىن.

“The Qazaq Times”