27 qañtar. Almatı qalalıq sotınıñ apellyaciyalıq alqası azamattıq belsendi Mirbolat Mırzataywlına qatıstı ükimdi özgerissiz qaldırdı. Birinşi instanciya sotı şığarğan tört jıl türme jazası sol küyi saqtaldı. Apellyaciya ümit boldı. Biraq sot onı da jauıp tastadı.

Bwl istiñ formulası qarapayım: bir adam memlekettik mekemede qazaq tilinde qızmet körsetudi talap etti, al memleket onı «wltaralıq arazdıqtı qozdırdı» dep tanıdı. Medeu audandıq sotı osı ayıppen Mirbolat Mırzataywlın tört jılğa bas bostandığınan ayırdı. Apellyaciyalıq sot bwl şeşimdi zañdı dep tanıp, qorğau tarapınıñ barlıq ötinişin qanağattandırmadı.

Apellyaciyalıq sot otırısına belsendiniñ özi qatıstırılğan joq. Onıñ tağdırı talqılanğan sätte, sol tağdır iesiniñ dauısı estilmedi. Bwl jay tehnikalıq jayt emes, qorğanu qwqığınıñ mazmwnına qatıstı auır swraq. Sot ädildigi eñ aldımen adamdı tıñdaudan bastaluı tiis edi.

Qorğauşılar sotta istiñ qoldan qwrastırılğanın, ayıptaudıñ naqtı dälelderge emes, sub'ektivti tüsindiruge süyengenin ayttı. Olar Mirbolat Mırzataywlınıñ äreketin azamattıq wstanım, zañdı talap dep bağalaudı swradı. Prokuror bwğan qarsılıq bildirdi. Sot alqası prokuror poziciyasın qabıldap, ükimdi özgerissiz qaldırdı.

Bwl şeşim tek bir adamnıñ tağdırına qatıstı emes. Bwl memlekettik tildiñ naqtı märtebesine qoyılğan swraq. Eger Qazaqstanda memlekettik tilde söyleudi talap etu qılmısqa teñestirilse, onda Konstituciyadağı til turalı baptıñ özi qağaz jüzinde ğana qalmay ma? Memlekettik til zañmen bekitilgen norma ma, älde tek saltanattı wran ba?

Mirbolat Mırzataywlınıñ isi qoğamda ülken rezonans tudırdı. Onıñ jaqtastarı belsendini bosatudı talap etip, bwl isti söz bostandığı men azamattıq qwqıqtarğa qısım dep bağaladı. Qwqıq qorğauşılar da istiñ sayasi jäne simvoldıq sipatına nazar audarıp otır. Alayda sot jüyesi bwl dauıstardı estimegendey keyip tanıttı.

15 qañtarda Mirbolat Mırzataywlı Almatıdan Taraz qalasındağı tüzeu mekemesine auıstırıldı. Bir adamnıñ geografiyasın özgertu oñay. Al ädilettiñ ornın auıstıru mümkin emes. Ädilet ne bar, ne joq. Bwl iste sot onıñ bar ekenin däleldey almadı.

Ükim özgermedi. Biraq qoğamnıñ swrağı özgerdi. Memlekettik tildi talap etken adam türmege jabılatın elde zañ kim üşin jwmıs isteydi? Sot kimniñ sözin tıñdaydı? Al ädilet qayda?

Bwl swraqtarğa apellyaciyalıq sot jauap bergen joq. Biraq olardı qoğam wmıtpaydı.

The Qazaq Times