Tramp ükimeti Tayuandı qoldauın küşeytti

AQŞ pen Tayuannıñ (Tayvan') qauipsizdik jönindegi joğarı lauazımdı twlğaları 40 jıldan keyin alğaş ret kezdesu ötkizdi. Äri, bwl kezdesude taraptardıñ  arasındağı ıntımaqtastıqtı tereñdetu mäseleleri talqılanğan. Bwnday mälimetti Tayuan Sırtqı ister ministrligi bir kün bwrın mälimdedi.

Tayuan Sırtqı ister ministrliginiñ mälimetine qarğanda, Wlttıq qauipsizdik keñestiniñ bas hatşısı Li Davey men Aq üydiñ Wlttıq qauipsizdik jönindegi keñesşisi Jon Bolton kezdesken. Olar AQŞ-Tayuan arasındağı ıntımaqtastıqtı tereñdetu, Tayuannıñ qauipsizdigin qamtamasız etuge AQŞ-tıñ qoldau körsetui taqırıptarın keñesken. Kezdesu, Li Daveydiñ 13-21 mamır künderi aralığındağı AQŞ saparı kezinde ötken. Odan beri eki el lauazımdısınıñ kezdesui turalı resmi mälimet taratılmağan.

Aq üy lauazımdı twlğasınıñ Tayuan ükimetiniñ ökilderimen kezdesui Tramp ükimetiniñ Tayuandı qoldap otırğandığın körsetedi. Beyjiñ biligi Tayuandı KHR-nıñ provinciyası retinde tanitındıqtan, özge eldermen diplomatiyalıq baylanıs ornatuına qarsı twradı. Äri, aralğa sayasi jäne äskeri qısımdı jıldan jılğa küşeytip keledi.  Al, AQŞ pen Qıtay arasında sauda teñsizdigine baylanıstı kelispeuşilik pen Oñtüstik Qıtay teñizine baylanıstı qayşılıqtar bar. Sondıqtan, Beyjiñ biligi üşin AQŞ pen Tayuannıñ tereñ ıntımaqtastıq ornatuı öziniñ ırıqsız orında qaluımen birdey.

Mamır ayınıñ basında AQŞ-ta Tayuan qorğanısın qamtamasız etuge qoldau körsetu jäne qarım-qatınastı nığaytu turalı zañ qabıldandı. 2010 jıldan beri Pentagon men Tayuan arasında 15 mlrd AQŞ dolları köleminde qaru-jaraq ötkerildi.

“The Qazaq Times”