Foto: QA

 Qazaq öneriniñ mädeniet keñistiginde ornı tolmas qayğı orın alıp, Qazaqstannıñ halıq artisi, teatr jäne kino aktrisası şığarmaşılıq ömiriniñ 60 jılğa juıq uaqıtın Mwhtar Äuezov atındağı Qazaq memlekettik akademiyalıq drama teatrına arnağan, öner qayratkeri Zämzägül Tüsipbayqızı Şäripova wzaqqa sozılğan auır nauqastan dünie salğan bolatın.

Teatrda marqwmnıñ soñğı saparğa şığarıp saluğa arnalğan qaralı mitingi ötti. Oğan Astanadan Qazaqstan Respublikasınıñ Mädeniet jäne sport ministriniñ Jauaptı hatşısı Quatjan Serikqazıwlı Uäliev arnayı kelip, qayğılı qazağa qatıstı Qazaqstan Respublikasınıñ Prezidenti atınan kelgen jedelhattı oqıp berdi.

«Zämzägül Nüsipbayqızı wlttıq dramaturgiya salasındağı talanttı akterler şoğırınıñ beldi ökilderiniñ biri bolatın. Onıñ kinoda jäne teatr sahnasında somdağan ayşıqtı rölderin önersüyer qauım ärdayım qızığa tamaşaladı. Ol eşkimge wqsamaytın qaytalanbas qoltañbası arqılı öz salasında ayrıqşa iz qaldırdı. Zämzägül Şäripovanıñ qazaq önerindegi erekşe ornı men jarqın didarı eşqaşan wmıtılmaydı dep senemin», – delingen jedelhatta.

Bwl qaralı jiındı Mwhtar Äuezov atındağı Qazaq memlekettik akademiyalıq drama teatrınıñ direktorı, Qazaqstannıñ eñbek siñirgen qayratkeri Ashat Maksimwlı Maemirov jürgizdi.

-        Zämzägül Nüsipbayqızı Şäripova - bizdiñ M.Äuezov atındağı Qazaq memlekettik akademiyalıq drama teatrında 60 jılğa juıq öziniñ şığarmaşılıq qızmetin, ğwmırın arnadı. Osı jıldardıñ işinde wlttıq jäne älemdik klassikalıq dramaturgiyalarda jüzden astam beynelerdi somdadı. Bir-birine wqsamaytın jüzden astam arulardıñ «obrazdar galereyasın» jasadı. Solar sahnalıq keyipkerlerdiñ işindegi eñ şoqtığı biigi M.Äuezovtiñ «Qaragöz» tragediyasındağı Qaragöz beynesi bolıp esepteledi. Qaragöz – Z.Şäripovanıñ sahnalıq boytwmarı, teatr önerindegi «tölqwjatı». Qaragözdiñ işki psihologiyalıq iirimderin, qoyılımdağı jındanar sättegi emociyalıq jay-küyin Zämzägül apay käsibi şeberliktiñ şıñına jetkizip twrıp somday bildi. Körermenniñ jüregine jetkize bildi. Sondıqtan bizdiñ qazaq teatrınıñ tarihına Qaragöz beynesi altın äriptermen jazılıp qaldı.

Wlı jazuşı M.Äuezovtiñ özi de Zämzägül Şäripovanıñ dauısına, obraz somdaudağı şeberligine tänti bolıp, «Tragediyadağı men surettegen, jazğan Qaragözdiñ bolmıs-bitimin Zämzägül Şäripova şınayı, öte biik deñgeyde jetkizdi» dep bağa berui, teginnen-tegin emes. Tipti, dauıs mänerine, ünine, qoñır dauısına tamsanıp «Seniñ atıñ Zämzägül emes, Zämzäm-Käusar! Sebebi seniñ dausıñda keremet käusar ün bar!» dep bağa bergeni körermenderdiñ jadında.

Ämbebep öner şeberi. Tek teatr ğana emes, sonımen birge kino, dublyaj, radio salasında tındırımdı eñbek etip, öz qoltañbasın qaldırdı. San wrpaq qazaq radiosınan Zämzägül Şäripova oqığan ertegilerdi tıñdap, halıq auız ädebietinen susındap, tağılım alıp östi. Sondıqtan wlanğayır elimizdegi birneşe buın wrpaq üşin, Zämzägül Şäripova – qazaq öneriniñ ayaulı anası.

Ädilğazı Baqıtwlı Kereev

“The Qazaq Times”