Astana qalasınıñ azamattıq ister jönindegi audanaralıq sotı belsendi Äygerim Tileujanovanıñ bas prokuraturağa qarsı tüsirgen şağımın qanağattandırudan bas tarttı.

Şağımğa biıl qañtarda parlamentte esep bergen Qazaqstan bas prokurorı Berik Asılovtıñ "äuejaydı basıp aluşılar" qatarında belsendini de atağanı sebep bolğan. Belsendi sottan özine qatıstı aytılğan aqparattı ar-namıs pen abıroyğa nwqsan keltiredi dep tanıp, bas prokuraturadan bas prokuror Berik Asılovtıñ aytqandarın joqqa şığarıp, keşirim swrauğa mindetteudi talap etken. Tileujanovanıñ advokatınıñ aytuınşa, Berik Asılovtıñ mälimdemesi ayıptaluşınıñ qwqıqtarın bwzıp, kinäsizdik prezumpciyasına qayşı.

11 qazanda şıqqan sot şeşimi sot kabinetinde äli jariyalanğan joq.

Sot şeşimine qarağanda, biıl jıl basında deputattıñ swrağına jauap bergen bas prokuror "jappay tärtipsizdikti wyımdastıruşılar, wyımdasqan qılmıstıq top turalı aytqan, olardıñ arasında dini ekstremistik wyım müşeleri, bwrın sottalğan, QDT (Qazaqstanda "ekstremistik wyım" dep tanılğanmen Europarlament onı "beybit oppoziciyalıq wyım" dep atağan) qozğalısınıñ jaqtastarı bar" dep aytqan.

"Sonımen birge [bas prokuror öz sözinde] Almatı äuejayın Ä. E. Tileujanova emes, ekstremistik wyımnıñ eki müşesi Nwrpeyisov pen Tileujanov basıp alğanın aytqan. Prokurordıñ jauabında däl sol şağım beruşiniñ tegi aytılğanı däleldenbegen. Säykesinşe sot ar-namısqa tidi degen aqparat rastalmadı" dep jazılğan şeşimde.

Sottıñ aytuınşa, sonımen birge "şağım beruşi jaq wsınğan filologtıñ qorıtındısı ötinişti qanağattandıruğa negiz bola almaydı, sebebi mamannıñ saraptama jürgizuge licenziyası bolmağan". Osı jäne özge de jayttardı eskergen sud'ya ötinişti qanağattandırmağan.

Äygerim Tileujanovanıñ advokatı Aynara Aydarhanova Azattıqqa bergen swhbatında sot şeşimimen kelispeytinin ayttı.

"Bwl azamattıq is boyınşa şeşim sot ükimine qayşı. Bas prokuratura azamattıq şağımdı qaraudı sot ükimi zañdı küşine engenşe keyinge qaldırudı swradı. Ärine, men qarsı boldım, sebebi istiñ özi mausımda qozğalğan, al şeşim 11 qazanda şıqtı. 4 ay bwl azamattıq is üşin tım wzaq. Qalay bolğanda da, Äygerimge jappay tärtipsizdik boyınşa ayıp tağılıp otır. Al bas prokuror öz sözinde ekstremistik wyımnıñ müşesi turalı jäne äuejaydı basıp alu turalı ayttı, al bwl baptar Äygerimge tağılğan joq. YAğni, bwl eki istiñ bir-birine qatısı joq. Al biz sotqa şağım tüsirmes bwrın, bas prokuratura bwl is sotta dep jauap bergen, biraq bizge mäsele Äygerimde emes, onıñ tegine wqsas adam jöninde bolıp otırğanına dälel kelirgen joq. Endi sot ükimine qayşı keletin wstanım [payda boldı]", - dedi Aynara Aydarhanova. Ol sot şeşimin apellyaciyağa beretinin ayttı.

Advokat Aydarhanovanıñ aytuınşa, sud'ya sot otırısı kezinde Qañtar oqiğası boyınşa (Tileujanova emes) Tileujanovqa qatıstı qılmıstıq is bar ma dep swrağan. Advokattıñ aytuınşa, sotta oğan jauap bolmağan.

"Olardıñ jauaptarı är kez ärtürli boldı. Meniñ oyımşa, apellyaciyalıq sot otırısı 20 qazanğa şegerilgendikten, al bwl is mausım ayınan beri kele jatır, sot osınday şeşim şığarğan. Meniñşe, [tegi wqsas adam turalı nwsqanı] oylap taptı" dedi Aynara Aydarhanova.

Biıl 5 qañtarda bas prokuror Berik Asılov parlamenttiñ birlesken otırısında isteri äli sotqa jetpegen belsendiler Äygerim Tileujanova men Qalas Nwrpeyisovti "kinäliler" qatarında atağan. Ayıptaluşılardıñ jaqtastarı osılayşa bas prokuror olardıñ qwqıqtarına qayşı äreket jasap, kinäsizdik prezupmciyasın bwzdı dep ayıptadı.

Qañtar oqiğası kezinde "äuejaydı basıp alu isi" boyınşa sot naurızda bastaldı. Tergeu boljamınşa, Äygerim Tileujan men Qalas Nwrpeyisov Qañtar oqiğası kezinde "Almatı äuejayı aumağında jappay tärtipsizdik wyımdastırıp", jwrttı "narazılıqqa ündegen". Ayıptaluşılar tağılğan ayıptardı joqqa şığarğan. Qwqıq qorğauşılar istiñ sayasilanğanın aytqan.

Şilde ayında sot Äygerim Tileujandı 4 jılğa bostandığınan ayırıp, qauipsizdigi ortaşa tüzeu koloniyasına jibergen. Bwğan qosa, sud'ya ayıptaluşılar Qalas Nwrpeyisov, Nwrlan Dälibaev, Ermwhamet Şilibaev, Janaydar Kärmenovtiñ ärqaysın 8 jılğa bostandığınan ayırıp, qauipsizdigi ortaşa tüzeu koloniyasına jiberu jöninde ükim kesken. Qırküyek basında osı ükimge qatıstı apellyaciya sotı bastaldı.