Q.Toqaev bıltır Qañtar oqiğasın alğaşqı künderden bastap «terroristik şabuıl» jäne «memlekettik töñkeris jasauğa talpınıs» dep sipattadı. Sol kezde Toqaev «Almatığa 20 000 terrorist şabuıl jasadı» degen ağılşınşa tvitin köp wzamay öşirip tastadı. Bıltır säuirde amerikalıq The National Interest jurnalında şıqqan maqalasında Toqaev Qañtar qırğının terrorizm nemese bilikti küşpen basıp aluğa talpınıs dep sipattamadı.
Sodan beri bir jıldan asa uaqıt ötti. Alayda sayasi rejim bıltır qañtarda Qazaqstannıñ birneşe qalasına şeteldik jäne jergilikti terroristter şabuıl jasağanın däleldeytin faktiler keltire almadı.
24 säuirde Astana qalası qılmıstıq ister jönindegi audanaralıq sotı Toqaevtıñ Qañtar oqiğasın «memlekettik töñkeris jasau talpınısı» dep körsetetin narrativin quattaytın şeşim şığardı. Sottıñ şeşimimen Wlttıq qauipsizdik komitetiniñ (WQK) eks-törağası Kärim Mäsimov 18 jılğa sottaldı. Ol «memleketke satqındıq jasadı», «bilikti küşpen basıp almaq boldı» jäne «qızmetin asıra paydalandı» degen baptar boyınşa kinäli dep tanılıp, ömir boyı memlekettik qızmetpen aynalısa almaytın boldı. Memleketke 10 mlrd teñge men 24 mln dollar öndirilipti.
Sonımen qatar, K.Mäsimovtiñ orınbasarları A. Cadıqwlov 16 jılğa, D.Erğojin 15 jılğa, M.Osipov 3 jılğa sottaldı.
«Mäsimov jäne orınbasarları isi» boyınşa sot jabıq ötkendikten, Qañtar qırğını aşıq äri tolıq zerttelmegendikten, sottıñ şeşimi jaylı pikir bildiruge aqparat jetkiliksiz. Al jazağa qatıstı qwqıqtıq bağanı zañgerler bere jatar.
Sayasattanuşı retinde aytar bolsam, bıltırdan beri Mäsimovti Qañtar oqiğasın bastı wyımdastıruşı retinde meñzeytin sayasi kommunikaciya taktikalarına kuä boldıq. Mäselen, bıltır eks-prezident N.Nazarbaev jurnalisterdiñ Mäsimovtiñ wstaluına qatıstı swrağına «Isa payğambar janındağı Iudanıñ satqın ekenin bilip pe edi?» dep jauap bergen edi. Sonday-aq jurnalist Gul'nara Bajkenova bıltır 3 qañtarda Aqordada Q.Toqaev pen K.Mäsimovtiñ jeke küzeti arasında şayqastan kisi ölimi boldı degen mälimdeme jasadı. Aqorda men WQK ol mälimdege eş reakciya bildirmedi. Odan bölek el arasında Mäsimov Toqaevqa 25 mln dollar tielgen wşaqqa otırıp, Aqordanı tastap ketudi wsınıptı degen äñgime köp taradı.
Meniñ oyımşa, kelesi üş swraqqa naqtı jauap berilmey, Qañtar qırğınınıñ şındığın aşuğa alğaşqı qadam jasaldı dep aytuğa kelmeydi:
1.Q.Toqaevtıñ WQŞW (ODKB) äskerin Qazaqstanğa şaqıruına jäne «terroristterdi» eskertusiz atuğa bwyrıq beruine ne sebep boldı?
2.Qañtar qırğını kezinde Qauipsizdik keñesi törağalığı Nazarbaevtan Toqaevqa qalay ötti?
3.Qañtar qırğınınıñ alğaşqı künderi Nazarbaevtıñ nemere inisi S.Äbiş WQK törağasınıñ birinşi orınbasarı qızmetinen ne sebepti şettetildi jäne onıñ «Mäsimov jäne onıñ orınbasarları isine» qatısı tekserildi me?
Eñ bastısı, köpşiliktiñ köz aldında «Iudanı» jazalau kem degende 238 adamnıñ öliminiñ qwpiyasın aşudı jäne olardıñ ölimine jauaptılardı qwqıqtıq jäne sayasi jauapkerşilikke tartu mäselesin azamattıq qoğam jadınan öşiruge qızmet etpeui kerek.