Şıñjañdağı etnikalıq toptarğa jasağan qısımı üşin AQŞ Qıtayğa sankciya salmaq

Evronyus agenttiginiñ (fr.euronews.com) habarlauınşa , AQŞ Şıñjañ ölkesindegi adam qwqıqtarınıñ ayaq astı etiluine baylanıstı Qıtayğa sankciya dayındauda. Batıstıñ özge de aqparat qwraldarınıñ mälimetinşe, Qıtayda twratın mwsılmandardıñ qısımğa alınuına qatıstı mäsele Aq üyde birneşe ay boyı  talqılanıp kelgen.  

Mäselen, «The New York Times»-tiñ Aq Üydiñ bwrınğı jäne qazirgi qızmetkerleriniñ sözderine süyenip jazılğan aqparatına qarağanda, Tramp ükimeti osı mäselege baylanıstı qıtaylıq bilik ökilderi men iri firmalarğa arnayı sankciya dayındau üstinde. Sankciya turalı şeşimniñ Aq üy, Sırtqı ister jäne Qarjı ministrliginde jan-jaqtı qarastırılıp jatqanı belgili boldı. Ekonomikalıq sankciyalardan bölek, Qıtay biligi tarapınan ondağı türki halıqtarı men mwsılmandarğa qarsı qısımda qoldanılğan AQŞ tehnologiyalarınıñ Qıtayğa satıluına da tıyım salu josparlanıp jatqan körinedi. Sonımen, eger sankciyalar qoldanısqa engen jağdayda, AQŞ biligi Qıtaydı alğaş ret adam qwqıqtarın bwzuına baylanıstı jazalanatın bolmaq.

BWW Ötken ayda şamamen eki million mwsılmannıñ Qıtaydağı lager'lerge alınğanı jäne olardı Kıtay Kommunistik partiyasınıñ ideologiyasına beyimdeu siyaqtı, sayasi tärbieleu jwmıstarınıñ atqarılıp jatqanın habarlağan edi.

Osı mäselege qatıstı Qıtay Sırtqı ister ministrligi de mälimdeme jasap ülgergen. Qıtay SİM-niñ baspasöz hatşısı Hua Çunni, AQŞ-tıñ Beyjiñ biligine Şıñjañdağı adam qwqıqtarınıñ ayaq astı etiluine baylanıstı sankciya salu şeşimine qatıstı: "Qıtay adam qwqıqtarın qorğau isinde AQŞ-tağıdan äldeqayda köş-ilgeri" - dep, Qıtaydağı etnikalıq azşılıq toptardıñ äsirese, dini bostandıqtarınıñ zañmen qorğalatınına basa nazar audarğan.

Bwdan bwrın, 10 qırküyekte Halıqaralıq «H'yuman Rayts Votç» adam qwqığın qorğau wyımı da (Human Rights Watch, HRW ) Qıtay ükimetiniñ eldiñ soltüstik-batısında ornalasqan Şıñjañdağı azşılıq toptardıñ qwqıqtarınıñ ayaq astı etilip jatqanına qatıstı mälimdeme jasağan edi. Jalpı, Qıtaydağı azşılıq top degende, onıñ özimizdiñ qandastarımızğa da qatısı bar ekeni tüsinikti. Bwğan deyin Şıñjañda qısım körip jatqan qazaqtardıñ jay-küyi turalı mäsele az aytılıp-jazılmadı äri bizdiñ biliktiñ de aldına qoyılğan bastı mindet edi. Endi, oğan Amerika siyaqtı eldiñ aralasuı mäseleniñ qanşalıqtı halıqaralıq deñgeyge jetkenin körsetse kerek.

“The Qazaq Times”