ەكى كۇن بۇرىن (جەرگىلىكتى ۋاقىت 27 قازان 17:00 شاماسىندا) گونكونگتاعى اقش كونسۋلدىعىنا 4 گونكونگتىق جاس ساياسي باسپانا سۇراي بارعان. ولاردى باستاپ بارعان ۋاڭ توڭ ەسىمدى ستۋدەنت گونكونگتا تۋىلعان اقش ازاماتى، ول وزگە ۇشەۋىنە قۇراما شتاتتاردىڭ قورعان بولۋىن سۇراعان. دەگەنمەن، اقش كونسۋلدىعى ولاردى كەرى قايتارۋىنا تۋرا كەلگەن.

اتالعان ۋاڭ توڭ ەسىمدى ستۋدەنت كەشە امەريكالىق اقپارات اگەنتتىگىنە سۇحبات بەرگەن. ونىڭ ايتۋىنشا ولاردى ۇلتتىق قاۋىپسىزدىك قىزمەتى باقىلاپ ءجۇر، ولار ءوز قاۋىپسىزدىگى ءۇشىن اقش كونسۋلدىعىنان كومەك سۇراعان. «ءبىز ءبارىمىز ۇلتتىق قاۋىپسىزدىك ورگاندارىنىڭ باقىلاۋىندامىز، انتيكوممۋنيستىك مالىمدەمەلەر جاسادىق، سوندىقتان جەكە قاۋىپسىزدىگىمىز ءۇشىن الاڭدايمىز»، – دەگەن ۋاڭ توڭ.

انىعىندا ولاردىڭ قاتارىندا 5 ادام بولعان جانە اقش كونسۋلدىعىنا 27 قازان تاڭعى ساعات سەگىزدەر شاماسىندا بارۋدى جوسپارلاعان، الايدا ۇلتتىق قاۋىپسىزدىك قىزمەتكەرلەرى تارابىنان بىرەۋ تۇتقىندالىپ، قالعاندارى ۋاقىتشا باس ساۋعالاپ تۇرعان. كونسۋلدىق ولاردىڭ تالابىن قاناعاتتاندىرا العان جوق

«شىندىعىندا، ولار مەنىڭ جاعدايىمدى، مەنىڭ امەريكا ازاماتى ەكەنىمدى جانە گونكونگ پوليتسياسى مەن ۇلتتىق قاۋىپسىزدىك قىزمەتكەرلەرى مەنى ىزدەپ جاتقانىن بىلەدى. تالقىلاۋدان كەيىن ولار ماعان مەنى قورعاۋ ءۇشىن كوپ نارسە جاساي المايتىندىقتارىن ايتتى»، – دەيدى اتالعان ستۋدەت.

جاڭا ۇلتتىق قاۋىپسىزدىك زاڭى قابىلدانعاننان كەيىن گونكونگ جاستارىنىڭ وي مەن ءسوز ەركىندىگى ايقىن شەكتەلە باستادى. گونكونگ پوليتسياسى مەن ۇلتتىق قاۋىپسىزدىك قىزمەتىنىڭ ازاماتتاردى ساياسي كوزقاراستارى مەن نارازىلىق ارەكەتتەرى ءۇشىن قۋدالاي جيىلەي تۇسكەن.

“The Qazaq Times”