كورنەكى سۋرەت. تۇرمىستىق-الەۋمەتتىك جاعدايى ابدەن السىرەپ، دەگراداتسياعا ۇشىراعان قازاقستان قوعامىندا كەيىنگى جىلدارى ايەلدەر مەن بالالارعا قارسى جاسالاتىن زورلىق-زومبىلىق ارەكەتى كوبەيگەن. فوتو: www.vaticannews.va

QT  ساۋالى اياسىندا باس پروكۋروتۋرا قازاقستاندىق وتباسىلاردا ءجيى كەزدەسەتىن زورلىق-زومبىلىق كورسەتۋ قىلمىسىنىڭ  كەسىرىنەن بيىل كامەلەت جاسىنا تولماعان 26 جەتكىنشەك-بالا زارداپ شەككەنىن مالىمدەدى. 

ەكى جىل ىشىندە رەسپۋبليكا بويىنشا تۇرمىستاعى زورلىق-زومبىلىق ايىبى نەگىزىندە 1711 قىلمىستىق قۇقىق بۇزۋشىلىق تىركەلدى.

بىلتىر بۇل كورسەتكىش 1055 بولعان ەكەن. ال بيىل قاڭتار-تامىز ارالىعىندا 656 جاعداي ەسەپكە الىنعان.

قازاقستاننىڭ باس پروكۋراتۋراسىنىڭ رەداكتسياعا بەرگەن جاۋابىنا قاراعاندا، 2019 جىلى وسى سيپاتتاعى قىلمىستىڭ سالدارىنان 1175 ازامات جاپا شەككەن. ونىڭ ىشىندە 646 ايەل، كامەلەتكە تولماعان 47 جەتكىنشەك-بالا بار. ال بيىل قاڭتاردان بەرگى سەگىز ايدا 615 ادام جابىرلەنگەن. ولاردىڭ 297-ءسى ايەل، 26-سى بالا.

قازاقستان قوعامىندا بەلەڭ العان تۇرمىستىق-وتباسىلىق الىمجەتتىك بويىنشا 2019 جىلى – 652, 2020 جىلدىڭ باسىنان بەرى – 235 ءىس سوتقا جولدانعان. بۇدان وزگە وتكەن جىلى 403, بيىل 235 ءىس تاراپتاردىڭ تاتۋلاسۋىنا بايلانىستى توقتاتىلعان.

الەۋمەتتانۋشى ساراپشىلاردىڭ ايتۋىنشا، رەسمي ستاتيستيكا شىنايى احۋالدان الدەقايدا الىس. سەبەبى ءداستۇرلى وتباسى ينستيتۋتىنىڭ ەسكىدەن قالىپتاسقان زاڭدىلىقتارى بويىنشا كوپتەگەن ازاماتتاردىڭ ءبارى بىردەي وسىنداي جاعدايعا دۋشار بولسا دا قۇزىرلى ورگاندارعا جۇگىنە بەرمەيدى. ارىز تۇسكەن كۇننىڭ وزىندە جەرگىلىكتى پوليتسيا ۋچاسكەلەرى بۇعان ۇساق-تۇيەك ماسەلە رەتىندە قارايتىندىقتان، ءىس قوزعاپ، شارا قولدانۋعا تىرىسپايدى. وسى فاكتورلاردى ەسەپكە الساق، «بۇۇ-ايەلدەر» قورى مالىمدەگەندەي جىلىنا وتباسىداعى الىمجەتتىكتەن 400-دەي ايەل قايتىس بولادى دەگەن اشىق ستاتيستيكانىڭ شىندىققا جاقىن ەكەنىن اڭعارۋ قيىن ەمەس.

"The Qazaq Times"