ترامپ: «تاليبان» كۇرەسۋدەن شارشادى

جەكسەنبىدە وتكەن ءباسپاسوز جيىنىندا اقش پرەزيدەنتى دونالد ترامپ اۋعانستانداعى تالىپتەرمەن 7 كۇندىك اتىستى توقتاتۋ كەلىسىمىنىڭ «ويداعىداي» ءوتىپ جاتقانىن، ساناۋلى كۇندە «تاليبان» توبىمەن بەيبىت كەلىسىمگە كەلۋدىڭ مۇمكىن ەكەنىن مالىمدەدى.

ترامپتىڭ بۇل مالىمدەمەسىنەن ءبىر كۇن بۇرىن، ياعني 22 اقپاندا تاراپتاردىڭ ۋاقىتشا اتىستى توقتاتۋ كەلىسىمىنە بەلگىلەنگەن 7 كۇندىك مەرزىمى باستالعان ەدى. ترامپ ءۇندىستان ساپارىنىڭ الدىندا جۋرناليستەرگە جاۋاپ بەرگەندە، شارتتى ۋاقىت ءساتتى باستالعانىن، «الداعى كۇندەردە نە بولاتىنىن» كورگىسى كەلەتىنىن، سونداي-اق، اۋعانستانداعى بەيبىتشىلىك وسى 7 كۇندىك شارتتى ۋاقىتپەن تىكەلەي قاتىستى ەكەنىن ايتىپ وتكەن.

«اۋعانستانداعى زورلىق-زومبىلىقتى ازايتۋ» دەپ اتالاتىن كەلىسىم ءساتتى جۇزەگە اساتىن بولسا، بۇل اقش پەن «تاليبان» اراسىندا الداعى اپتادا دوحادا وتەتىن بەيبىت كەلىسىمگە جول اشادى. تاراپتار راسىندا بەيبىتشىلىك كەلىسىمىنە قول قوياتىن بولسا، وندا اقش ءوز تاريحىنداعى ەڭ ۇزاق سوعىستاردىڭ ءبىرىن توقتاتىپ، اسكەرلەرىن شىعارۋى مۇمكىن. دەگەنمەن، اقش قورعانىس ءمينيسترى مارك ەسپەردىڭ ءسوزىن ەسكە سالا كەتەيىك، ول ەكى اپتا بۇرىن گەرمانيادا جاساعان مالىمدەمەسىندە اقش اسكەرى اۋعانستاننان تولىق شەگىنەدى دەگەندى جوققا شىعارعان، تەك اسكەر سانى قىسقارۋى مۇمكىن ەكەنىن ايتقان بولاتىن.

جەكسەنبىدە پرەزيدەنت ترامپ جۋرناليستەرگە: «ەگەر اتىستى توقتاتۋ ءبىر اپتاعا جەتپەيتىن ۋاقىتتا جۇزەگە اسسا، ارينە، مەن ءوز اتىمدى كەلىسىم پاراعىنا جازامىن. ۇيگە قايتاتىن كەز كەلدى»، – دەگەن. ول جانە: «مەنىڭ ويىمشا، ولار (تالىپتەر) كەلىسىمگە كەلگىسى كەلەدى، ولار كۇرەسۋدەن شارشادى»، – دەدى.

تاراپتار بۇل كەلىسىمدەردى كاتاردىڭ دوحا قالاسىندا 18 اي بويى تالقىلاپ، ءتۇزىپ شىققان بولاتىن. ايتا كەتەيىك، دوحادا تالىپتەردىڭ ساياسي كەڭەسى ورنالاسقان.

“The Qazaq Times”