2022 جىلعى قاندى قاڭتار وقيعاسى كەزىندە سەمەي قالاسىنىڭ پوليتسياسىندا ازاپتالىپ ولتىرىلگەن جاندوس جوتاباەۆتىڭ ءىسى بويىنشا ايىپتالعان ۋاقىتشا قاماۋ يزولياتورىنىڭ فەلدشەرى گۇلميرا تولەۋبەكوۆا ءبىر جىلعا شارتتى تۇردە سوتتالدى. بۇل جونىندە «ۆلاست» سايتى جازدى. 

سوت تولەۋبەكوۆانى ءۇش جىل مەديتسينا مەكەمەلەرىندە جۇمىس ىستەۋ قۇقىعىنان ايىرىپ، جابىرلەنۋشىلەر وتەماقى قورىنا 30 630 تەڭگە وندىرەدى. بۇعان قوسا، وعان مورالدىق وتەماقى رەتىندە جوتاباەۆتىڭ وتباسىنا 500 مىڭ تەڭگە تولەۋ مىندەتتەلدى.

تولەۋبەكوۆاعا «كەزدەيسوق ءبىر ادامنىڭ ولىمىنە اكەلگەن مەديتسينا قىزمەتكەرىنىڭ كاسىبي مىندەتىن ءتيىستى دارەجەدە ورىنداماۋ» (317-باپ) بويىنشا ايىپ تاعىلعان. بۇعان دەيىن قورعاۋ تارابى فەلدشەردىڭ جوتاباەۆ ولىمىنە قاتىسى جوعىن ايتىپ، بۇل ءىس بويىنشا ءبىرىنشى كەزەكتە ونى ازاپتاعان پوليتسيا قىزمەتكەرلەرى مەن ۋاقىتشا قاماۋ يزولياتورىن جاۋاپقا تارتۋ قاجەتتىگىن ايتقان.

جوتاباەۆتىڭ ولىمىنە بايلانىستى بولەك پروتسەستە «قاتىگەز، ادامگەرشىلىككە جاتپايتىن نەمەسە قادىر-قاسيەتتى قورلايتىن قارىم-قاتىناس، ازاپتاۋلار» (146-باپ) بابى بويىنشا ەكى پوليتسيا قىزمەتكەرى الىشەر قاناقىنوۆ جانە ەرسۇلتان اعزانوۆقا ايىپ تاعىلعان. ولاردىڭ سوتى ەندى عانا باستالعان.

جاندوس جوتاباەۆ بىلتىر 6 قاڭتاردا «بەيبىت ميتينگىگە قاتىسقانى ءۇشىن» ۇستالعان. اقپاراتقا قاراعاندا، پوليتسيا بولىمشەسىندە ەكى كۇن قاماۋدا بولعان جوتاباەۆ ەكى كۇننەن كەيىن ۋاقىتشا قاماۋ يزولياتورىنا اۋىستىرىلعان. 17 قاڭتاردا يزولياتور قىزمەتكەرلەرى جەدەل جاردەم شاقىرىپ، جوتاباەۆتىڭ قايتىس بولعانىن حابارلاعان. جاندوس جوتاباەۆتىڭ باۋىرى 2022 جىلى اقپاندا زەرتتەۋ كەزىندە مارقۇمنىڭ وكپەسىنەن سۇيىقتىق تابىلعانىن، مۇنداي جاعداي قاتتى سوققىعا جىعىلعان ادامدا بولاتىنىن ايتقان. باۋىرىنىڭ ايتۋىنشا، ونىڭ 11 قابىرعاسى سىنعان.

جۋىردا سەمەي سوتى قاڭتار وقيعاسى كەزىندە ۋاقىتشا قاماۋ يزولياتورىندا قازا بولعان ەلدوس قاليەۆتىڭ ولىمىنە بايلانىستى ايىپتالعان ەكى پوليتسيا قىزمەتكەرىنە ءۇش جىل شارتتى جازا بەرگەن.