ماڭعىستاۋ وبلىسىندا اۋىز سۋ تاپشىلىعىن كەزەڭ-كەزەڭىمەن شەشۋ ءۇشىن 2025 جىلعا دەيىن 7 جوبانى ىسكە اسىرۋ جوسپارلانعان. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ماڭعىستاۋ وبلىسىنىڭ اكىمى نۇرلان نوعاەۆ مالىمدەدى.

​قازىرگى ۋاقىتتا وبلىستا اۋىز سۋدى تۇتىنۋ كولەمى 162 مىڭ تەكشە مەتردى قۇرايدى. ال سۋ تاپشىلىعى اسىرەسە جازعى كەزەڭدە قاتتىراق سەزىلەدى، قاجەتتىلىك بۇگىندەت تاۋلىگىنە 77 مىڭ تەكشە مەترءدى قۇراپ وتىر. سوندىقتان وسى كەزدەن باستاپ سۋ تاپشىلىعىن جويۋعا بايلانىستى جوبالار كەزەڭ-كەزەڭىمەن جۇزەگە اسىرىلۋدا. ماسەلەن، «قاراجانباس» كەن ورنىندا قۋاتتىلىعى تاۋلىگىنە 17 مىڭ تەكشە مەتردى قۇرايتىن سۋ تۇشىتۋ زاۋىتى ىسكە قوسىلعان. بۇعان دەيىن كاسىپورىن «استراحان-ماڭعىشلاق» قۇبىرىنان سۋ الىپ كەلگەن بولاتىن. ناتيجەسىندە «استراحان-ماڭعىستاۋ» سۋ قۇبىرىنان بوساعان 10 مىڭ تەكشە مەتر اۋىز سۋ جاڭاوزەن قالاسى، بەينەۋ، جەتىباي اۋىلدارى تۇرعىندارىنىڭ يگىلىگىنە پايدالانىلۋدا. سۋ تاپشىلىعىن جويۋ ماقساتىندا جۇزەگە اسىپ جاتقان تاعى ءبىر شارا «كاسپي» سۋ تۇشىتۋ زاۋىتىنىڭ قۋاتىن ەكى ەسەگە ۇلعايتۋ ارقىلى تاۋلىگىنە 40 مىڭ تەكشە مەترگە دەيىن جەتكىزۋ جوسپارلانۋدا. 2022 جىلدىڭ جازعى ماۋسىمىندا قۋاتتىلىعى 5 مىڭ تەكشە مەتر تۇشىتۋ قوندىرعىسى پايدالانۋعا بەرىلدى. ال قالعان جۇمىستار 2023 جىلدىڭ سوڭىنا دەيىن اياقتالادى.

«سونىمەن قاتار، اقتاۋدا جەكە ينۆەستوردىڭ ەسەبىنەن تاۋلىگىنە 20 مىڭ تەكشە مەتر سۋ تۇشىتۋ قوندىرعىسىنىڭ قۇرىلىسى جۇرگىزىلۋدە. جىل سوڭىنا دەيىن 10 مىڭ تەكشە مەتر سۋ الۋدى جوسپارلانعان. مەملەكەت باسشىسى العا قويعان 12 اۋىلدى ورتالىقتاندىرىلعان سۋمەن جابدىقتاۋ جونىندەگى مىندەتى بۇگىندە تولىق ورىندالدى. ناتيجەسىندە ەلدىمەكەندەردە حالىقتىڭ اۋىز سۋعا قولجەتىمدىلىگى 96 پايىزدان 100 پايىزعا دەيىن جەتتى»، – دەدى ماڭعىستاۋ وبلىسىنىڭ اكىمى نۇرلان نوعاەۆ.

بۇدان بولەك بيىل ف.شەۆچەنكو قالاسىندا تاۋلىگىنە 5 مىڭ تەكشە مەتر، «ماەك» اۋماعىندا 24 مىڭ تەكشە مەتر جانە كەندىرلى ايماعىندا 50 مىڭ تەكشە مەتر سۋ تۇشىتۋ قوندىرعىلارىن سالۋ جۇمىستارى باستالادى.

«پرەزيدەنت ۇكىمەتكە وبلىس ورتالىعىنداعى ينجەنەرلىك جەلىلەردى قايتا قۇرۋعا قاجەتتى قاراجات ءبولۋدى تاپسىردى. وڭىردەگى سۋ تاپشىلىعى ماسەلەسىن شەشۋدىڭ ءبىرى «ماەك» كەشەنىن اكىمدىكتىڭ كوممۋنالدىق مەنشىگىنە وتكىزۋ بولىپ تابىلادى. كاسىپورىندى كوممۋنالدىق مەنشىككە بەرۋدىڭ ارقاسىندا بىزدە كاسىپورىندى جاڭعىرتۋ باعدارلاماسىن ازىرلەۋ مۇمكىندىگى پايدا بولدى. جەرگىلىكتى اتقارۋشى ورگاننىڭ رەزەرۆىنەن ەلەكتر ستانتسياسىنىڭ توزعان جابدىقتارىن، تۇششىتۋ قوندىرعىلارىنىڭ سورعى جابدىقتارىن جانە دوۋ ءۇشىن جىلۋ الماستىرعىش تۇتىكتەردى اۋىستىرۋعا 2,6 ملرد. تەڭگە مولشەرىندە قاراجات ءبولىندى. سونداي-اق، ەلەكتر ستانسالارى مەن ماەك سۋ تۇشىتۋ كەشەنى جابدىقتارىنىڭ سەنىمدى جۇمىسىن قامتاماسىز ەتۋ ءۇشىن رەسپۋبليكالىق بيۋدجەتتەن جابدىقتار مەن جيىنتىق قۇرالدار ساتىپ الۋعا 4,9 ملرد تەڭگە كولەمىندە قاراجات بولۋگە ءوتىنىم جولداندى»، – دەدى وبلىس اكىمى.