قازاقستاننىڭ ءتۇرلى ايماعىندا 1 مامىردا ميتينگ وتكىزۋ تۋرالى ءوتىنىش بەرىلىپ جاتقان كەزدە اقتاۋدا ازاماتتىق بەلسەندى ۇلبوسىن تۇرديەۆا 20 تاۋلىككە قامالدى. #بەلسەندىلەرەكسترەميستەمەس تەلەگرام-ارناسىنىڭ حابارلاۋىنشا، سوت شەشىمىنە كەلىسپەگەن بەلسەندى اشتىق جاريالاعان. بۇل تۋرالى ورتالىق ازيا جاڭالىقتار قىزمەتى جازدى.

ازاتتىق ءتىلشىسى ازىرگە بەلسەندى وتىرعان ۋاقىتشا قاماۋ يزولياتورىنان جاۋاپ الا المادى.

سوت ونى "جالا جابۋ" بابى بويىنشا كىنالى دەپ تاپقان. Sud.kz سايتىنداعى مالىمەتكە قاراعاندا، ءىستى سۋديا ايدا اتاشەۆا قاراعان. ازىرگە پورتالعا سوت شەشىمى جاريالانعان جوق.

#بەلسەندىلەرەكسترەميستەمەس تەلەگرام-ارناسىنىڭ حابارلاۋىنشا، شامامەن ەكى اي بۇرىن بەلسەندى تىكەلەي ەفيرگە شىعىپ، "Z" بەلگىسى بار (رەسەيدىڭ ۋكرايناداعى سوعىسىنىڭ بەلگىسى) دۇكەن يەسىنىڭ ۇستىنەن شاعىم تۇسىرگەن. ءوز كەزەگىندە دۇكەن يەسى دە تۇرديەۆانىڭ ۇستىنەن شاعىم ءتۇسىرىپ، ونى جالا جاپتى دەپ ايىپتاعان. ىزىنشە اكىمشىلىك ءىس قوزعالىپ، سول ءىس بويىنشا بەلسەندى اكىمشىلىك قاماۋعا الىندى. تەلەگرام-ارنانىڭ جازۋىنشا، پوليتسيا تۇرديەۆانىڭ شاعىمىن قاراۋسىز قالدىرعان.

ال دۇكەن يەسى نۇراي دوسمۇحامەدوۆا ازاتتىققا Aizere اتتى دۇكەنىنىڭ لوگوتيپى 16 جىلدان بەرى تۇرعانىن، دۇكەن اتاۋىنىڭ "سوعىسقا ەش قاتىسى جوعىن" ايتىپ، بەلسەندى "مەنى قارالادى" دەدى.

قازاقستان ايماقتارىندا بەلسەندىلەر 1 مامىردا ميتينگ وتكىزۋگە ءوتىنىش بەرىپ جاتقاندا، پاۆلوداردا سوت بەلسەندى ەمبەرگەن قۇرمانوۆتى بەيبىت ميتينگ ەرەجەسىن بۇزدى دەگەن ايىپپەن 15 كۇنگە قاماعان. بۇعان دەيىن بىرقاتار ايماقتا بەلسەندىلەر جەرگىلىكتى اكىمدىك بەيبىت ميتينگ وتكىزۋگە رۇقسات بەرمەي جاتقانىن حابارلاعان. اكىمدىكتىڭ رەسمي جاۋاپتارىندا 1 مامىردا "باسقا شارا وتەتىنى" جازىلعان.

قازاقستاندا 2020 جىلى "بەيبىت جيىن تۋرالى" جاڭا زاڭ قابىلدانعانىمەن، قۇقىق قورعاۋشىلار ازاماتتاردىڭ بەيبىت جيىن وتكىزۋ جانە جينالۋ قۇقىعى ءالى شەكتەلىپ وتىرعانىن سىنايدى. حالىقارالىق جانە قۇقىق قورعاۋشىلار رەسمي استانانى ازاماتتاردىڭ بەيبىت جينالۋ قۇقىعىن ساقتاۋعا ۇندەپ كەلەدى.

قازاقستان بيلىگى ەلدە ازاماتتاردى ساياسي بەلسەندىلىگى ءۇشىن قۋدالايتىنىن مويىندامايدى.