اقش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى جونىندەگى كومەكشىسى دونالد لۋ 22-27 ءساۋىر ارالىعىندا قىرعىزستان مەن تاجىكستاندا بولادى. بۇل تۋرالى اقش مەملەكەتتىك حاتشىسىنىڭ سايتىندا حابارلاندى، -دەپ جازدى ورتالىق ازيا جاڭالىقتار قىزمەتى.

رەسمي مالىمەت بويىنشا، امەريكالىق ديپلومات بىشكەكتە ۇكىمەت وكىلدەرىمەن كەزدەسىپ، "ەكى ەل اراسىنداعى جانە ايماق ماقساتتارىن شەشۋ" ماسەلەلەرىن تالقىلايدى.

"مەملەكەتتىك حاتشىنىڭ كومەكشىسى لۋ ەكونوميكا جەتەكشىلەرىمەن جانە ازاماتتىق قوعام وكىلدەرىمەن كەزدەسىپ، قۇراما شتاتتاردىڭ قىرعىزستان ەكونوميكاسىن قولداۋ ادىستەرىن تالقىلايدى. سونىمەن بىرگە، ايەلدەر مۇمكىندىگى، ادام قۇقىقتارى جانە ءباسپاسوز ەركىندىگى ءسوز بولادى", - دەپ حابارلادى مەملەكەتتىك دەپارتامەنت.

ودان سوڭ لۋ دۋشانبەگە بارادى. تاجىكستان استاناسىندا ەكى ەل اراسىنداعى ارىپتەستىك، سونىڭ ىشىندە قاۋىپسىزدىك ماسەلەلەرى تالقىلانادى. مەملەكەتتىك دەپارتامەنت مالىمەتىنشە، دونالد لۋ باق پەن ازاماتتىق قوعام وكىلدەرىمەن دە كەزدەسىپ، ء"باسپاسوز ەركىندىگىنىڭ، مىقتى ازاماتتىق قوعام قالىپتاستىرۋدىڭ ماڭىزدىلىعىن" ايتادى.

ءبىر جىلعا جۋىق ۋاقىت بۇرىن اقش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى جونىندەگى كومەكشىسى دونالد لۋ ايماق ەلدەرىنە ساپارى اياسىندا تاجىكستانعا دا سوققان. سول كەزدە دۋشانبەدە تاجىكستان مەن قۇراما شتاتتار اراسىندا توعىزىنشى رەت ساياسي پىكىر-الماسۋ ۇيىمداستىرىلعان. تاجىكستانعا ساپارىنىڭ اياعىندا دونالد لۋ ازاتتىق راديوسىنىڭ تاجىك قىزمەتى - وزودي راديوسىنا سۇقبات بەرگەن.