جاڭاوزەن قالاسىندا تۇراقتى جۇمىس تالاپ ەتكەن تۇرعىنداردىڭ نارازىلىعى جالعاسىپ جاتىر. 7 ساۋىرگە قاراعان ءتۇنى جينالعاندار قالا اكىمدىگى الدىندا قونىپ شىقتى. پوليتسيا شارا "زاڭسىز" ەكەنىن ەسكەرتتى. جينالعاندار اكتسيا جونىندە بيلىككە ەسكەرتۋ جاساعانىن، زاڭ بۇزباعانىن ايتتى. بۇل تۋرالى ورتالىق ازيا جاڭالىقتار قىزمەتى جازدى.

ء"بىزدىڭ ءبىر عانا تالابىمىز بار – جۇمىس. بىزگە جۇمىس بەرمەيىنشە، وسىندا تۇرامىز. ەشتەڭە شەشىلمەسە، جينالعاندار اشتىق جاريالاۋعا دا دايىن" دەدى اكتسياعا قاتىسۋشىلاردىڭ ءبىرى ۆيدەومالىمدەمەدە.

اكىمدىك الدىندا تۇندە 10 شاقتى ادام قونعان دەپ ايتىلادى.

7 ساۋىردە كۇندىز نارازىلاردىڭ ءبىرى وزدەرىنە قىسىم كۇشەيگەنىن، پوليتسەيلەر ادامداردى اكىمدىك الدىنان قۋىپ جاتقانىن حابارلادى. تۇرعىندار جىبەرگەن ۆيدەولاردا اكىمدىك الدىندا پوليتسيا كولىگى تۇرعانى، پوليتسيا قىزمەتكەرلەرى جۇرگەنى كورىنەدى.

جاڭاوزەن پوليتسياسى ازىرشە وقيعاعا تۇسىنىكتەمە بەرگەن جوق.

قازىر جاڭاوزەندە ەكى جەردە نارازىلىق بولىپ جاتىر. ءبىرى اكىمدىك الدىندا: جەرگىلىكتى تۇرعىندار وزدەرى مەن وتباسى مۇشەلەرىن تۇراقتى جۇمىسقا ورنالاستىرۋدى تالاپ ەتىپ وتىر.

ەكىنشىسى – 4 ساۋىردە باستالعان "وزەنمۇنايگاز" كومپانياسى الدىنداعى نارازىلىق.

"وزەنمۇنايگازعا" ەنشىلەس "بەرالى ماڭعىستاۋ Company" مەكەمەسىندە ىستەيتىن 100-دەن استام مۇنايشى 1 ساۋىردەن باستاپ جۇمىسسىز قالعانىن ايتىپ، تۇراقتى جۇمىس تالاپ ەتىپ كەلەدى.

"وزەنمۇنايگاز" كومپانياسىنىڭ قۇرامىنا 16 وندىرىستىك مەكەمە كىرەدى. كومپانيانىڭ رەسمي سايتىنداعى اقپاراتقا قاراعاندا، كاسىپورىندا 9 مىڭنان استام ادام جۇمىس ىستەيدى. كومپانيا وزەن جانە قاراماندىباس كەنىشتەرىن يگەرۋمەن اينالىسادى.

2021 جىلى جازدا جانە كۇزدە "كەزبي" كومپانياسىنىڭ جۇمىسشىلارى بىرنەشە رەت ەرەۋىل جاساپ، جالاقى ءوسىرۋدى جانە ەڭبەك جاعدايىن جاقسارتۋدى تالاپ ەتكەن. 2023 جىلى مامىردا 26 جۇمىسشى استاناعا بارىپ، ەڭبەك جانە حالىقتى الەۋمەتتىك قورعاۋ مينيسترلىگى مەن "قازمۇنايگاز" كومپانياسى عيماراتتارىنىڭ الدىندا ەكى اپتا قونعان. جۇمىسشىلاردىڭ ءبىر بولىگى جۇمىستان شىعارىلىپ، تامىزدا "بەرالى ماڭعىستاۋ Company" مەكەمەسىنە جۇمىسقا ورنالاسقان.