جوعارعى سوت: ايگەرىم تىلەۋجانننىڭ ءماجىلىس دەپۋتاتتىعىنا كانديدات رەتىندە سايلاۋعا قاتىسۋىنا كەدەرگى جوق

"الماتىداعى №3 ءبىرمانداتتى اۋماقتىق سايلاۋ وكرۋگىنىڭ سايلاۋ كوميسسياسىنىڭ حاتتاماسى زاڭسىز دەپ تانىلدى. ولقىلىقتى تۇزەۋ تۋرالى شەشىم شىعارىلدى. بۇل – تۇپكىلىكتى شەشىم" دەدى سۋديا بەرىك ناجىمەدەنوۆ.

الماتىداعى №3 ءبىرمانداتتى اۋماقتىق سايلاۋ وكرۋگى ايگەرىم تىلەۋجاندى 19 ناۋرىزدا وتەتىن ءماجىلىس سايلاۋىنا ۇمىتكەر رەتىندە تىركەۋدەن باس تارتقان. 18 اقپاندا كوميسسيا مۇشەلەرى ايگەرىم تىلەۋجاننىڭ سايلاۋ جارناسىن تولەگەنى تۋرالى بانك مالىمەتىنە كۇمان كەلتىرگەن.

"ايگەرىم تىلەۋجان 17 اقپاندا جارنا تولەگەنى تۋرالى تۇبىرتەك ۇسىندى. ۇمىتكەردى تىركەۋگە نەگىز بولاتىن قۇجاتتى ۇيقاماقتا وتىرىپ ۇسىنعاندىقتان، قۇجاتتىڭ دۇرىستىعى كۇمان تۋعىزادى" دەپ جازىلعان سايلاۋ كوميسسياسىنىڭ حاتتاماسىندا.

ايگەرىم تىلەۋجان سايلاۋ جارناسىن سەنىمدى وكىلى ارقىلى تولەگەنىن، بۇل جايت زاڭعا قايشى ەمەس ەكەنىن العا تارتىپ، جوعارعى سوتقا شاعىمدانعان.

سوت وتىرىسى كەزىندە سۋديا شاعىمدانۋشى ايگەرىم تىلەۋجاننىڭ سايلاۋ جارناسىن تولەگەنى تۋرالى قۇجاتتى بانك راستاعانىن ايتتى. بانك انىقتاماسىندا 17 اقپاندا ورتالىق سايلاۋ كوميسسياسىنىڭ ارناۋلى شوتىنا ايگەرىم تىلەۋجاننىڭ اتىنان 1 ميلليون 50 مىڭ تەڭگە اقشا تۇسكەنى جازىلعان.

بۇدان كەيىن اۋماقتىق سايلاۋ وكرۋگى وكىلى "وزدەرىنە پروكۋراتۋرادان حات كەلگەنىن، وندا ۇيقاماقتا وتىرعان ايگەرىم تىلەۋجاننىڭ سايلاۋعا قاتىسقانى وعان قويىلعان شەكتەۋگە، ياعني ۇيقاماق شاراسىنا قايشى كەلەتىنىن جانە قىلمىستىق ءىستىڭ وبەكتيۆ تەرگەلۋىنە كەدەرگى بولۋى مۇمكىن ەكەنى" جازىلعانىن ايتتى.

"سايلاۋ تۋرالى" زاڭدا ۇيقاماقتاعى ادامدى ۇمىتكەر رەتىندە تىركەمەۋ جونىندە جازىلعان با؟" دەپ سۇرادى سۋديا. الايدا اۋماقتىق سايلاۋ وكرۋگىنىڭ وكىلى "پروكۋراتۋرانىڭ ءسوزىن ورىنداۋعا مىندەتتىمىز" دەپ قانا جاۋاپ بەردى. سۋديا زاڭ بويىنشا ازامات ۇيقاماقتا بولعانى ونىڭ ۇمىتكەر رەتىندە تىركەلۋىنە كەدەرگى ەمەس ەكەنىن ءتۇسىندىردى.

ادۆوكات اينارا ايدارحان ايگەرىم تىلەۋجان سايلاۋ كوميسسياسىنا قايتا تىركەلىپ، سايلاۋ كامپانياسىنا كىرىسەتىنىن ايتتى.

الماتى سوتى قاڭتار وقيعاسىنا بايلانىستى ايىپتالعان بەلسەندى ايگەرىم تىلەۋجاندى ەكى ايعا ۇيقاماققا الۋ تۋرالى 2022 جىلعى 17 قاراشادا شەشىم شىعارعان. وعان بايلانىس قۇرالدارىن پايدالانۋعا، الەۋمەتتىك جەلىگە جازبا جازۋعا تىيىم سالعان.

بيىل قاڭتاردا قازاقستان پارلامەنتىندە وتكەن تىڭداۋ كەزىندە باس پروكۋرور بەرىك اسىلوۆ ايگەرىم تىلەۋجاندى "قاڭتار وقيعاسى كەزىندە الماتى اۋەجايىن باسىپ الۋدى ۇيىمداستىرۋشى" رەتىندە اتاعان.

بىلتىر قازان ايىنىڭ سوڭىندا ايگەرىم تىلەۋجان ءوزىن قاڭتار وقيعاسىمەن بايلانىستى ىستە "كۋاگەردەن" "كۇدىكتىگە" اۋىستىرعانىن حابارلاعان ەدى. ايتۋىنشا، ول 5 قاڭتاردا الماتى اۋەجايىندا جاپپاي تارتىپسىزدىكتى ۇيىمداستىردى دەگەن كۇدىككە ىلىنگەن.

ايگەرىم تىلەۋجان قاڭتار وقيعاسى كەزىندە اۋەجايعا بارعانىن مويىنداعان، بىراق "اۋەجايدى باسىپ الۋ ارەكەتىن ۇيىمداستىردى" دەگەن ايىپتى جوققا شىعارعان.