بۇگىن الماتىدا ءبىر توپ پارلامەنت ماجىلىسىنە كانديدات جيىن وتكىزىپ، سايلاۋدا ساياسي بلوك قۇراتىندارىن مالىمدەدى. بلوك مانيفەستىنىڭ كەيبىر بولىگى توقاەۆتىڭ تۇجىرىمداماسىنا ۇقسايدى.

قازاقستان ءباسپاسوز كلۋبىندا وتكەن جيىنعا ساياساتكەر ەرمۇرات باپي، مۇحتار تايجان، سانجار بوقاەۆ، تاۋەلسىز باقىلاۋشى ارايلىم نازاروۆا، ەكونوميست ايمان تۇرسىنحان جانە قۇقىق قورعاۋشى ەرلان قاليەۆ قاتىستى. ولار الداعى پارلامەنت سايلاۋىندا ساياسي بلوكقا توپتاساتىندارىن ايتتى.

جيىن قاتىسۋشىلارىنىڭ بارلىعى قۇرىلىپ جاتقان بلوكتىڭ ەشقانداي ساياسي ۇيىم ەمەس ەكەنىن مالىمدەدى. ولاردىڭ سوزىنشە، كانديداتتار سايلاۋعا بولا وسىنداي بلوكقا توپتاسقان.

– ءبىز بىرلەسكەن ۇيىم قۇرىپ جاتقان جوقپىز. ءبىز تاۋەلسىز كانديدات رەتىندە سايلاۋ كەزىندە عانا باس قوسىپ جاتىرمىز. نە سەبەپتى؟ ويتكەنى پارتيالار ونسىز دا ماجىلىستە 70% ورىن الادى. ولاردىڭ بارلىعى بيلىكشىل. بيلىك ولاردى تولىقتاي باقىلاۋدا ۇستايتىن بولادى. ءوزىن ءوزى ۇسىنۋدى سوڭعى 18 جىلدا ءبىز بيىل كورىپ وتىرمىز. سول سەبەپتى بۇل قوعام ءۇشىن مۇمكىندىك. ءبىز بىرىگۋ ارقىلى بيلىككە ايتقىمىز كەلەدى، ەگەر ءبىز شىن مانىندە «جاڭا قازاقستاندى» قۇرعىمىز كەلسە، وندا سايلاۋ دا ءادىل ءوتۋى ءتيىس. قوعامعا ءۇن تاستاعىمىز كەلەدى. بۇل قوعام ءۇشىن مۇمكىندىك. كەلىڭىزدەر، تاۋەلسىز كانديداتتاردى قولداڭىزدار. پارتيالىق جۇيەدەن تىس كۇش بولادى. ول بيلىكتىڭ باقىلاۋىنان تىس، قوعامنىڭ مۇددەسىن قورعايدى، – دەدى سانجار بوقاەۆ.

ايمان تۇرسىنحان ءبىر مانداتتى وكرۋگتەن ءتۇسىپ جاتقان كانديداتتاردىڭ باستى ۇستانىمى ماجوريتارلىق جۇيە. سول سەبەپتى پارتيالىق تىزىممەن سايلاۋ وتكىزۋگە قوعام بولىپ قارسى شىعۋ قاجەت دەيدى.

– ءبىر مانداتتى وكرۋگ بويىنشا سايلاۋعا ءتۇسىپ جاتقاندار اراسىندا پارتيا مۇشەلەرى وتە كوپ. سايلاۋدا پارتيالىق ءتىزىم بويىنشا داۋىس بەرگەندە ءسىز ادامداردىڭ اتى-ءجونىن كورمەيسىز. ءسىز كىمگە داۋىس بەرىپ جاتقانىڭىزدى بىلمەيسىز. ءسىز پارتيالىق جەمقورلىققا داۋىس بەرەسىز. داۋىس سانالعاننان كەيىن سايلاۋ ىشىندە شتاب قۇرىلىپ، ساۋدا باستالادى. كىم، قانشاعا ءوزىنىڭ مانداتىن ساتىپ الادى؟ دەگەن ءتىزىم ءۇشىن ساۋدا بولادى. ءسىز ءوزىن ءوزى ۇسىنعان كانديداتتاردىڭ ۇستانىمىمەن كەلىسەسىز بە، جوق پا ول ماڭىزدى ەمەس. قازىر قوعام بولىپ پارتيالىق تىزىمگە قارسى ەكەنىمىزدى كورسەتۋىمىز كەرەك. ءبىز ماجوريتارلىق جۇيەنى قولدايمىز، – دەدى تۇرسىنحان.

ەرمۇرات باپي دە قۇرىلعان ساياسي بلوكتىڭ قاتىپ قالعان ۇيىم ەمەس ەكەنىن ايتتى. ونىڭ سوزىنشە، تاۋەلسىز كانديداتتار ەلدە جۇيەلى وپپوزيتسيا بولماعان سوڭ، ەرىكسىز وسىنداي بلوك قۇرۋعا ءماجبۇر بولعان.

– بۇل قاتىپ قالعان بلوك ەمەس. بۇل سايلاۋ قارساڭىندا تاۋەلسىز كانديداتتاردىڭ ەرىكسىزدەن جيناقتالعان قاۋىمداستىعى. نە سەبەپتى ەرىكسىز؟ ويتكەنى، ءبىزدىڭ ەلدە جۇيەلى، تۇتاسقان وپپوزيتسيا جوق. ءار جاقتا ىدىراپ جۇرگەن توپ. سولاردىڭ باسىن بىرىكتىرەتىن، وسى سايلاۋعا ءبىر ستراتەگيامەن شىعاتىن بىزدە وپپوزيتسيا بولعان جوق. وسى وتىرعان ازاماتتار سايلاۋ الدىندا وسىنداي بلوك قۇرىپ جاتىر. سوندىقتان بىزدە باسقا مۇمكىندىك جوق. ءبىز الاڭ ارقىلى وزگەرىسكە بارا المايمىز. ارتىمىزعا قاراساق، حالىق سانى سيرەك. جالعىز مۇمكىندىگىمىز وسى 30 پايىزدىق جۇيەمەن تاۋەلسىز كانديداتتاردىڭ پارلامەنتكە وتۋىنە مۇمكىندىك جاساۋ. سوندىقتان وسىنداي قاۋىمداستىق قۇرىپ، سايلاۋعا شاقىرۋدىڭ قامىن جاساپ جاتىرمىز، – دەدى باپي.

ساياسي بلوكتىڭ وزگە مۇشەلەرى دە وسىعان ۇقساس پىكىر ايتتى.

ساياسي بلوك مانيفەستىندە كانديداتتار پارلامەنتكە وتكەن جاعدايدا ەلدە بيلىكتىڭ ءۇش تارماعىنىڭ تەپە-تەڭدىگىن ساقتاۋعا، جەرگىلىكتى ءوزىن-ءوزى باسقارۋدى قامتاماسىز ەتۋگە، ءسوز بوستاندىعىنا شەكتەۋ قويماۋعا ۋادە بەرگەن.

بۇدان بولەك، مانيفەستە مىقتى پارلامەنت، ەسەپ بەرەتىن ۇكىمەت جونىندە دە ايتىلعان. بىراق پرەزيدەنت بيلىگى جونىندە ەشنارسە ايتىلماعان. بۇعان دەيىن پرەزيدەنت قاسىم-جومارت توقاەۆ حالىققا جولداۋىندا وسىعان ۇقسايتىن تۇجىرىمداما ۇسىنعان. ول «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» جونىندە ايتقان.

قازاقستاندا ءماجىلىس جانە ءماسليحات سايلاۋى 19 ناۋرىزدا بولادى. بيىلعى سايلاۋ ارالاس جۇيە 30 پايىز ماجوريتارلىق، 70 پايىز پارتيالىق ءتىزىم بويىنشا وتەدى.