باس پروكۋراتۋرانىڭ بۇرىنعى قىزمەتكەرى ارتۋر لاستاەۆ ادام قۇقىقتارى جونىندەگى ۋاكىل بولىپ تاعايىندالدى. ونىڭ كانديداتۋراسىن پرەزيدەنت قاسىم-جومارت توقاەۆ ۇسىنىپ، سەنات دەپۋتاتتارى ءبىر اۋىزدان قولدادى. بۇل تۋرالى ماسا مەديا جازدى.

39 جاستاعى ارتۋر لاستاەۆ بۇعان دەيىن باس پروكۋراتۋرانىڭ حالىقارالىق-قۇقىقتىق ىنتىماقتاستىق قىزمەتىنىڭ باستىعى، باس پروكۋراتۋرانىڭ ەۋروپاداعى وكىلى، قازاقستاننىڭ شۆەيتسارياداعى ەلشىسىنىڭ كەڭەسشىسى جانە ت. ب قىزمەتتەر اتقارعان.

ارتۋر لاستاەۆ قىزمەتتىك جولىن الماتى قالاسىنان باستاعان. ول 2006 جىلى بوستاندىق اۋدانىق پروكۋرورىنىڭ كومەكشىسى بولعان.

بۇعان دەيىن ادام قۇقىقتارى جونىندەگى ۋاكىل ەلۆيرا ءازىموۆا بولعان. ول بۇگىن كونستيتۋتسيالىق سوت توراعاسى بولىپ تاعايىندالدى.

قازاقستاندا بيىل ومبۋدسمەننىڭ وكىلەتىن كەڭەيتەتىن جانە ايماقتاردان وكىلدىگىن اشۋعا مۇمكىندىك بەرەتىن زاڭ قابىلدانعان. زاڭعا سايكەس، ومبۋدسمەن كونستيتۋتسيالىق سوتقا ادام قۇقىعى جانە ەركىندىگى بويىنشا نورماتيۆتىك قۇقىقتىق اكتىلەردىڭ كونستيتۋتسياعا سايكەستىگى ماسەلەلەرى بويىنشا جۇگىنە الادى. سونىمەن بىرگە مەملەكەتتىك ورگاندار، مەكەمەلەر مەن ازاماتتار اراسىنداعى داۋلاردى رەتتەۋ بويىنشا قوعامدىق ديالوگتارعا قاتىسا الادى.

زاڭ بويىنشا، ادام قۇقىقتارى جونىندەگى ۋاكىل مەملەكەتتىك ورگاندارعا ەسەپ بەرمەيتىن تاۋەلسىز ورگان بولۋى ءتيىس. ونى كۋاگەرى رەتىندە تەرگەۋگە بولمايدى.

بۇعان دەيىن قۇقىق قورعاۋشىلار استانانى ادام قۇقىقتارى جونىندەگى ۋاكىلدىڭ وكىلەتىنە قاتىستى تۇزەتۋلەردى جەتىلدىرۋگە شاقىرعان. ولار ومبۋدسمەندى سايلاۋ مەن ونىڭ وكىلەتىن توقتاتۋ ءتارتىبىن جەتىلدىرۋدى، تيىسپەۋشىلىك مارتەبەسىن ونىڭ ورىنباسارلارى مەن قىزمەتكەرلەرىنە دە بەرۋدى ۇسىنعان. رەسمي اقپارات بويىنشا، زاڭ جوباسىندا ەۋروپا كوميسسياسىنىڭ سەسسياسىندا بەرىلگەن رەكومەنداتسيالاردىڭ 50 پايىزى ەسكەرىلگەن.

قۇجاتقا سايكەس، قازاقستاننىڭ 17 ايماعىندا ادام قۇقىقتارى جونىندەگى وكىلدىك اشىلعان. وعان 2,4 ملرد تەڭگە بولىنگەن.