23 جەلتوقساندا تاڭەرتەڭ الماتىدا قاڭتار قۇرباندارىنا قويىلعان جاڭا ەسكەرتكىشتىڭ اشىلۋىنا قازاقستان پرەزيدەنت قاسىم-جومارت توقاەۆ تا قاتىسادى دەگەن حابار الەۋمەتتىك جەلىدە تارادى.

جۇما كۇنى تاڭەرتەڭ رەسپۋبليكا الاڭىنا بارعان ازاتتىق تىلشىلەرىن قاۋىپسىزدىك قىزمەتىنىڭ وكىلدەرى جاڭا ەسكەرتكىش جاققا وتكىزبەدى.

اينالادا پوليتسيا قىزمەتكەرلەرى ءجۇر. الاڭعا بىرنەشە اۆتوبۋسپەن ادامدار اكەلدى. اراسىندا بيۋدجەتتەن قارجىلاندىرىلاتىن مەكەمە قىزمەتكەرلەرى دە بار.

الماتى قالاسى اكىمدىگىنىڭ ءباسپاسوز قىزمەتى جاڭا ەسكەرتكىشتىڭ اشىلۋىنا قاتىسا الماعان ازاتتىق تىلشىلەرىنىڭ سۇراعىنا ازىرگە جاۋاپ بەرگەن جوق.

شارانىڭ وتەتىنى جايلى اقپارات قۇرالدارىنا كۇنىبۇرىن حابارلانبادى، اككرەديتاتسيا جايلى دا الدىن الا ايتىلعان جوق.

ء"تىل كەسپەك جوق" تەلەگرام-ارناسىنىڭ حابارلاۋىنشا، ۇلتتىق ارنادان 23 جەلتوقساندا الماتىدا "قاڭتار قۇرباندارىنا ارنالعان "تاعزىم" مەموريالى اشىلاتىنى" ايتىلعان. جاڭادان تۇرعىزىلعان مەموريال كەشەنىن اشۋ راسىمىنە مەملەكەتتىك باق وكىلدەرىن عانا كىرگىزگەن.