قازاقستان قارجى مونيتورينگ اگەنتتىگىنىڭ قىزمەتكەرلەرى جەكسەنبى كۇنى ۇستاعان جۋرناليست ميحايل كوزاچكوۆ ەكى ايعا قامالدى. بۇل تۋرالى 20 جەلتوقساندا الماتى سوتىنىڭ ءباسپاسوز قىزمەتى حابارلادى. بۇل تۋرالى ورتالىق ازيا جاڭالىقتار قىزمەتى جازدى.

"بۇگىن الماتى قالاسىنىڭ سوتىندا تەرگەۋ ورگاندارىنىڭ ميحايل كوزاچكوۆتى قاماۋ تۋرالى ءوتىنىشى قارالدى. تەرگەۋ سوتىنىڭ قاۋلىسىمەن تەرگەۋ ورگاندارىنىڭ ەكى ايعا قاماۋعا الۋ تۋرالى ءوتىنىشى قاناعاتتاندىرىلدى", - دەپ حابارلادى قالالىق سوت.

18 جەلتوقساندا قارجى مونيتورينگى اگەنتتىگى Kozachkov offside تەلەگرام-ارناسىنىڭ اۆتورى جانە "ۆرەميا" گازەتىنىڭ ءجۋرناليسى ميحايل كوزاچكوۆتىڭ قاماۋعا الىنعانىن جانە "بولات نازارباەۆتىڭ كومەكشىسىمىن" دەپ جۇرگەن ەلدوس قوسپاەۆتىڭ ۇيىمداسقان قىلمىستىق توبىنا كومەكتەستى" دەگەن كۇدىككە ىلىنگەنىن حابارلاعان.

قارجى مونيتورينگى "قوسپاەۆ رەيدەرلىك ارەكەت قۇرباندارىنا اقپاراتتىق شابۋىل جاساۋ ماقساتىندا كوزاچكوۆتىڭ قىزمەتىن پايدالاندى، كوزاچكوۆ ول ءۇشىن 52 ميلليون تەڭگە الدى" دەپ، بيزنەسمەن الماس ابدىعاپپاروۆ اتالاتىن "ەسەنتاي سيتي" جوباسىنداعى ۇلەستى رەيدەرلىكپەن باسىپ الۋ تۋرالى ءسوز بولىپ وتىرعانىن ايتقان.

19 جەلتوقساندا ء"ادىل ءسوز" ءسوز ەركىندىگىن قورعاۋ قورى "ميحايل كوزاچكوۆتىڭ قۇقىقتارى ورەسكەل بۇزىلدى، دەرەۋ بوساتىلسىن" دەپ قازاقستان پرەزيدەنتى قاسىم-جومارت توقاەۆقا حات جازعان.

20 جەلتوقساندا قازاقستان باس پروكۋراتۋراسى پرەزيدەنت قاسىم-جومارت توقاەۆتىڭ تاپسىرماسىمەن جۋرناليست ميحايل كوزاچكوۆتى قاماۋعا الۋ ءىسى بويىنشا تەكسەرىس باستاعانىن حابارلادى.