قاڭتار وقيعاسى كەزىندە ۇلىنان ايىرىلعان وسكەمەندىك ارايلىم ساعاتباەۆانىڭ «سومكەسىنەن اۋەجايدا وق تابىلۋىنا» بايلانىستى قوزعالعان ءىس «پاترون ىشىندە جارىلعىش زات بولماعاندىقتان» جابىلدى. بۇل جونىندە «ازاتتىق» راديوسى حابارلادى.

– تەرگەۋشى ماعان «پاتروننىڭ ادام ومىرىنە قاۋپى جوق دەپ تانىلدى، سوندىقتان ءىستى توقتاتتىق» دەدى. بالليستيكالىق ساراپتاما قورىتىندىسىندا پاترون ىشىندە وق-ءدارى بولماعانى انىقتالعان ەكەن، – دەيدى ساعاتباەۆا.

ونىڭ ايتۋىنشا، تەرگەۋشىلەر «وقتى سومكەگە سالىپ جىبەرۋى مۇمكىن» دەپ اۋەجايداعى قىزمەتكەرلەردىڭ بىرىنەن كۇدىكتەنەدى. بىراق ولار كۇدىكتىنى ساعاتباەۆانىڭ ارنايى شاعىمىنسىز ىزدەمەيتىندەرىن ايتقان.

– تەرگەۋشىنىڭ سوزىنە قاراعاندا، اۋەجايدىڭ ءبىر قىزمەتكەرى مەنىڭ سومكەمنىڭ الدىڭعى قالتاسى ورنالاسقان تۇستى بىرنەشە سەكۋندتاي ۇستاپ تۇرعانى بەينەتاسپاعا جازىلعان. بىراق نەلىكتەن سومكەنى ۇستاعانى تياناقتى تەكسەرىلمەگەن. مۇنى ءبىلۋ ءۇشىن تاعى شاعىم بەرۋىم كەرەك ەكەن. ەرتەڭ، 29 قاراشادا شقو پوليتسيا دەپارتامەنتى نەمەسە وبلىستىق پروكۋراتۋراعا شاعىم تۇسىرەمىن. ماعان كىم، نەلىكتەن قاستاندىق ىستەمەك بولعانىن بىلگىم كەلەدى. سونىمەن بىرگە ۇشاققا العان بيلەتىمنىڭ اقشاسى كۇيىپ كەتىپ، قايتارىلمادى، وعان كىم جاۋاپ بەرەدى؟ مورالدىق جانە ماتەريالدىق وتەماقى تالاپ ەتەمىن، – دەدى ساعاتباەۆا.

سونىمەن بىرگە ارايلىم ساعاتباەۆا وسى وقيعادان كەيىن الدەكىمدەر ەكىنشى بالاسى تۋرالى اقپارات سۇراستىرعانىن، ونىڭ جانە ءوزىنىڭ قاۋىپسىزدىگىنە الاڭدايتىنىن ايتتى.

– مەنى 16 قاراشادا اۋەجايدا ۇستاعان كۇننىڭ ەرتەڭىندە ەكىنشى ۇلىمنىڭ جۇمىس ورىنىنا بەلگىسىز ادامدار بارىپ، قىزمەتتەستەرىنەن ول تۋرالى سۇراپتى. سول كۇنى ۇلىم دەمالىستا بولاتىن. قازىر ونىڭ قاۋىپسىزدىگىنە الاڭداپ ءجۇرمىن. مەنى قورقىتقىلارى كەلە مە، الدە باسقا كوزدەگەندەرى بار ما، بۇل ادامداردىڭ ۇلىمدا نەسى بار ەكەن؟ بالام وتە ءتارتىپتى، جۇمىسىنان كەشىكپەيدى، شاقىرعان ۋاقىتىندا بارىپ جۇرەدى. «جامان ايتپاي جاقسى جوق», ونىڭ قاۋىپسىز بولعانىن قالايمىن، – دەدى ساعاتباەۆا.

ارايلىم ساعاتباەۆانىڭ ۇلكەن ۇلى قۋانىش قابىلحانوۆ وسكەمەندە قاڭتار وقيعاسى كەزىندە وق ءتيىپ قازا تاپقان. ۇلىنىڭ قازاسى بويىنشا قوزعالعان ءىس ۋاقىتشا توقتاتىلعان جانە وسكەمەننىڭ مامانداندىرىلعان تەرگەۋ سوتى ونىڭ شاعىمىن قاناعاتتاندىرماعانىن حابارلاپ، 14 قاراشادا قولىنا قاۋلى بەرگەن.

اناسى ءىستى جالعاستىرۋ ءۇشىن 16 قاراشادا استاناعا جوعارعى سوتقا بارماق بولعاندا كەدەن قىزمەتكەرلەرى وسكەمەن اۋەجايىندا ونى ۇستاپ الىپ قالدى.

قاۋىپسىزدىك قىزمەتكەرلەرى ونىڭ سومكەسىنەن «وق تابىلعانىن» حابارلاعان. ساعاتباەۆانى پوليتسيادا ءتورت ساعاتتاي ۇستاپ، ۇيىنە جىبەرگەن. ساعاتباەۆا مۇنى «ادەيى ۇيىمداستىرىلعان بولۋى مۇمكىن» دەيدى. ول ۇستالعاننان كەيىن «ەشقايدا شىعا الماي», اپپەلياتسيالىق شاعىمدى 18 قاراشادا ادۆوكاتى ارقىلى ونلاين وتكىزگەن.

قاڭتار وقيعاسى كەزىندە وسكەمەندە وققا ۇشىپ، مەرت بولعان ءۇش ازاماتتىڭ ءبىرى قۋانىش قابىلحانوۆتىڭ ارتىندا ايەلى مەن ءبىر جاستاعى قىزى قالدى. ارايلىم ساعاتباەۆا ۇلىنىڭ ولىمىنە كىنالىلەردى تابۋدى سۇراپ، جەرگىلىكتى اكىمدىككە، الماتى مەن استانا قالالارىنا دا بارعان ءارى پرەزيدەنتتىڭ قابىلداۋىنا دا جازىلعان. پرەزيدەنت اكىمشىلىگى «پرەزيدەنت قاسىم-جومارت توقاەۆ قازىر جەلتوقسان ايىندا جازىلعان ادامداردى قابىلداپ جاتىر» دەپ كەزەك كۇتۋىن سۇراعان.