وزبەكستان پرەزيدەنتى شاۆكات ميرزياەۆ جەلتوقسان ايىندا قىرعىزستانعا بارادى،- دەپ جازدى ورتالىق ازيا جاڭالقتار قىزمەتى.

بۇل تۋرالى پرەزيدەنت ءباسپاسوز قىزمەتىنىڭ وزبەكستانعا قايتا تاعايىندالعان شەتەل ەلشىلەرىنىڭ شاۆكات ميرزياەۆكە سەنىم گراموتاسىن تاپسىرۋىنا قاتىستى مالىمەتىندە ايتىلدى.

رەسمي راسىمدە پرەزيدەنت ميرزياەۆكە وڭتۇستىك كورەيا ەلشىسى كيم حي سانگ، قىرعىز رەسپۋبليكاسىنىڭ ەلشىسى مۇسا جامانباەۆ، الجير حالىق دەموكراتيالىق رەسپۋبليكاسىنىڭ ەلشىسى بۋمەديەن گەنناد، قازاقستان رەسپۋبليكاسىنىڭ ەلشىسى بەيبىت اتامقۇلوۆ، امەريكا قۇراما شتاتتارى ەلشىسى دجوناتان حەنيك سەنىم گراموتالارىن تابىستادى.

سالتاناتتى شارادا قىرعىزستان ەلشىسىمەن سويلەسكەن شاۆكات ميرزياەۆ "كەلىسسوزدەر ناتيجەسىندە شەكارا ماسەلەسىن رەتتەۋ جۇمىسى ۇلكەن جەتىستىك" بولعانىن ايتتى.

بۇعان دەيىن حابارلانعانداي، قاراشادا ەكى ەلدىڭ پارلامەنتتەرى وزبەك-قىرعىز شەكاراسى مەن كەمپىراباد سۋ قويماسىنا قاتىستى ەكى زاڭ جوباسىن ماقۇلدادى.

زاڭ جوبالارىنىڭ تۇرلىشە تالقىلانۋى قىرعىزستان ازاماتتىق قوعامى وكىلدەرىنىڭ نارازىلىعىن تۋعىزدى. سودان كەيىن بيلىك "جاپپاي تارتىپسىزدىك ۇيىمداستىرۋعا تالپىندى" دەگەن كۇدىكپەن 26 ساياساتكەر مەن بەلسەندىنى قاماۋعا الدى.

شاۆكات ميرزياەۆ سوڭعى مارتە قىرعىزستانعا بيىل شىلدە ايىندا بارعان. سول كەزدە ول شولپان-اتادا ورتالىق ازيا ەلدەرى باسشىلارىنىڭ كەڭەس الماسۋ كەزدەسۋىنە قاتىسقان.