اۋعانستانداعى تالىپتەر ۇكىمەتى شاريعات زاڭىن ەنگىزىپ جاتىر

بۇل - جۇرت الدىندا ولتىرۋعا، تاسپەن ۇرۋ، ادامنىڭ باسى مەن وزگە دە دەنە مۇشەلەرىن شابۋعا مۇمكىندىك بەرىلدى دەگەندى بىلدىرەدى. 2021 جىلدىڭ تامىزىندا بيلىكتى العان "تاليبان" قوزعالىسى 1990 جىلدارداعى تەوكراتيالىق ديكتاتۋرادان باس تارتىپ، "جۇمساق باسقارۋ سيپاتىنا" كوشۋگە ۋادە بەرگەن ەدى.

احۋندزادا سۋديالاردى شاريعات زاڭى بويىنشا "حۋدۋد" ساناتىنا جاتاتىن قىلمىستارعا ەرەكشە نازار اۋدارۋعا شاقىرعان. "ۇرلىق، قاراقشىلىق، كوزگە ءشوپ سالۋ نەمەسە كوزگە ءشوپ سالدى دەپ جالا جابۋ، ىشىمدىك ءىشۋ جانە دىننەن بەزۋ" دەپ اتالاتىن مۇنداي قىلمىستارعا شاريات جازاسى ناقتى بەلگىلەنگەن. قۇقىق قورعاۋشىلار ۇكىمەتتىڭ ۇستانىمىنا قايشى كەلەتىن كەز كەلگەن ازاماتتىق بەلسەندىلىك "دىننەن بەزۋ" سانالۋى مۇمكىن دەپ قاۋىپتەنەدى.

بىلتىر اۋعانستان بيلىگىن "تاليبان" العان سوڭ قۇقىق بۇزعان ادامعا كوپشىلىك الدىندا دۇرە سوعىپ جاتقان ۆيدەولار باق پەن الەۋمەتتىك جەلىدە پايدا بولعان. "تاليبان" پوليتسياسىنىڭ "ۇستاۋ كەزىندە ولگەن قىلمىسكەر" دەنەسىن جۇرت الدىنا تاستايتىنى بايقالعان.

تالىپتەر ۇكىمەتى بۇرىن ناتو-نىڭ اسكەري بولىمدەرى مەن حالىقارالىق ۇيىمداردا جۇمىس ىستەگەن نەمەسە ولارمەن بايلانىستا بولعان جۇرگىزۋشى، اۋدارماشى سياقتى ادامداردى قۋعىنداپ جاتىر دەيتىن پىكىرلەردى تەرىسكە شىعارۋعا تىرىسادى. اۋعانستان ايەلدەرىنىڭ ءبىلىم الۋ، جۇمىسقا تۇرۋ، قوعامدىق قىزمەتكەن اينالىسۋ، ەركىن ءجۇرىپ-تۇرۋ قۇقىقتارى دا كۇرت شەكتەلگەن.

"تاليبان" قوزعالىسىن الەمنىڭ كوپتەگەن ەلدەرى، سونىڭ ىشىندە قازاقستان دا تەررور ۇيىم دەپ سانايدى. الايدا 2021 جىلى تامىزدا اۋعانستانداعى بيلىكتى العان تالىپتەرمەن بىرقاتار ەلدەردىڭ رەسمي وكىلدەرى كەزدەسكەن. قازاقستان پرەزيدەنتىنىڭ ارناۋلى وكىلى باستاعان رەسمي دەلەگاتسيا كابۋلگە بارعان. رەسەي پرەزيدەنتى ءپۋتيننىڭ شاقىرۋىمەن ءتالىپ بيلىگىنىڭ باسشىلارى رەسەيگە بارىپ، رەسەيمەن ەكونوميكالىق كەلىسىم جاساسقان.