فوتو: rbc.ru

7 قىركۇيەكتە ءماجىلىس دەپۋتاتتارى "مەرەكەلەر تۋرالى زاڭعا" وزگەرىس ەنگىزىپ، 1 جەلتوقساندا تويلاناتىن تۇڭعىش پرەزيدەنت كۇنىن مەملەكەتتىك مەرەكە تىزىمىنەن الىپ تاستاۋدى ماقۇلدادى. بۇل تۋرالى ورتالىق ازيا جاڭالىقتار قىزمەتى جازدى.

تۇڭعىش پرەزيدەنت كۇنى ەندى "قوعامدىق جوعارى ماڭىزى بار داتا" بولادى. بۇعان قوسا، ءماجىلىس 25 قازان رەسپۋبليكا كۇنىن قايتارىپ، ۇلتتىق مەرەكە ستاتۋسىن بەردى. ال 16 جەلتوقسان تاۋەلسىزدىك كۇنى مەملەكەتتىك مەرەكە ستاتۋسىنا ءتۇستى.

2011 جىلى 10 جەلتوقساندا پارلامەنت "مەرەكەلەر تۋرالى" زاڭعا تولىقتىرۋلار ەنگىزىپ، 1 جەلتوقساندى تۇڭعىش پرەزيدەنت كۇنى رەتىندە اتاپ ءوتۋدى ماقۇلداعان. دەپۋتاتتار بۇل داتانى ەلدىڭ سول كەزدەگى پرەزيدەنتى نۇرسۇلتان نازارباەۆتىڭ "مەملەكەت الدىنداعى ەڭبەگىن تانىتۋ ماقساتىندا" مەملەكەتتىك مەرەكە دەپ جاريالاعان ەدى.

ال 1990 جىلعى 25 قازاندا ەگەمەندىك دەكلاراتسياسى جاريالانعان كۇن ەلدە 2009 جىلعا دەيىن "رەسپۋبليكا كۇنى" رەتىندە اتالىپ كەلگەن ەدى. كەيىن بۇل مەرەكە قوعام قارسىلىعىنا قاراماستان كۇنتىزبەدەن الىنعان.

رەسمي دەرەك بويىنشا 238 ادام قازا تاپقان قاڭتار وقيعاسىنان سوڭ ەكس-پرەزيدەنت نۇرسۇلتان نازارباەۆتىڭ بيلىككە ىقپالى السىرەپ، قازىرگى پرەزيدەنت قاسىم-جومارت توقاەۆتىڭ بيلىگى كۇشەيدى.

كەيىنگى ۋاقىتتا نازارباەۆقا قاتىستى شەشىمدەردىڭ كوبىن ءماجىلىس دەپۋتاتتارى ۇسىنىپ جاتىر. ماسەلەن، 5 مامىردا ءماجىلىس رەفەرەندۋم تۋرالى زاڭنان نازارباەۆتىڭ مارتەبەسىنە قاتىستى ءبولىمدى الىپ تاستاۋ ۇسىنىسىمەن كەلىسكەن ەدى. كەيىن 5 ماۋسىمدا كونستيتۋتسياعا وزگەرىستەر ەنگىزۋ تۋرالى رەفەرەندۋمنان كەيىن باس زاڭنان نازارباەۆقا بەرىلگەن "ەلباسى" ستاتۋسى الىندى. ال 2 قىركۇيەكتە ءماجىلىستىڭ ءبىر توپ دەپۋتاتى نۇر-سۇلتان قالاسىنا "استانا" اتاۋىن قايتارۋدى ۇسىندى.

ماجىلىستە وتىرعان دەپۋتاتتاردىڭ باسىم بولىگى نازارباەۆ تۇسىندا ونىڭ ساياساتىن جاپپاي قولداعان ەدى.