بايدەن بيلىككە كەلگەلى بەرى قىتاي باسشىسىمەن بەس-اق رەت تەلەفوندا سويلەسكەن. فوتو: رەيتەر

اپتا سوڭىنا قاراي اقش پرەزيدەنتى جو بايدەن مەن قىتاي باسشىسى شي ءجىنپىڭ ( سي تسزينپين) تەلەفون ارقىلى سويلەسۋدى جوسپارلاپ وتىر بۇل وسى اپتاداعى ەڭ ەلەۋلى وقيعالاردىڭ ءبىرى بولۋى مۇمكىن. سەبەبى، بايدەن مەن سي تەلەفوندا ۋكراينا مەن تايۋان (تايۆان) ماسەلەسىن دە ءسوز ەتەدى دەگەن بولجام بار.

قوڭىراۋ كەزىندە ەكى ەل باسشىسى اقش-قىتاي اراسىنداعى ەكونوميكالىق باسەكەلەستىكتى باقىلاۋعا الۋ بويىنشا ماسەلەلەردى باستى تاقىرىپ ەتەدى. بۇنى اق ءۇيدىڭ قاۋىپسىزدىك جونىندەگى كەڭەسشىسى وتكەن اپتانىڭ سوڭىندا مالىمدەگەن بولاتىن. دەگەنمەن، بايدەن مەن سي قازىرگى حالىقارالىق تارتىپتە اسا وزەكتى بولىپ تۇرعان ۋكراينا مەن تايۋان ماسەلەسىن دە تالقىلايدى. اق ءۇيدىڭ ءباسپاسوز جيىنىندا ەكى ەل باسشىسى تاراپتار ءۇشىن نازىك تاقىرىپتاردى سويلەسۋگە دايىن ەكەنىن ايتقان.

اقش پەن قىتاي قاتىناسى ترامپ كەزىنەن باستاپ سۋىدى، ساۋدا سوعىسىنان كەيىن تاراپتار اشىق باسەكەلەستىككە بەت بۇردى. رەسەي مەن ۋكراينا سوعىسى قىزىپ تۇرعان قازىرگى كەزدە اقش-قىتاي قاتىناسى حالىقارالىق قاتىناستار مەن گەوساياسي ماسەلەلەردى زەرتتەۋشىلەردىڭ باستى نازارىندا تۇر. باتىس تۇرعىسىنان قاراعاندا، جاھاندىق تۇراقتىلىق پەن قاۋىپسىزدىككە، حالىقارالىق تارتىپكە قاۋىپ ءتونىپ تۇرعان كەزدە، قىتايدىڭ رەسەيدىڭ تۇبەگەيلى قولداۋى دەموكراتيالىق الەم ءۇشىن ۇلكەن سوققى بولۋى مۇمكىن. سوندىقتان دا، اقش پەن قىتاي قاتىناسىنىڭ قالاي قاراي داميتىنى كوپ جۇرتتىڭ نازارىندا بولارى انىق.

دەگەنمەن، ۋاشينگتون مەن بەيجىڭ قاتىناسى ءالى دە الاڭداتارلىق دەڭگەيدە. ايتالىق، تايۋان تاقىرىبى ەكى ەل ورتاسىندا بارعان سايىن تەمپەراتۋراسى كوتەرىلىپ كەلە جاتقان جارىلعىش زاتقا ۇقساپ تۇر. اقش لاۋازىمدى تۇلعالارىنىڭ تايۋانعا ساپارلاي بارۋى جيىلەدى، ال بەيجىڭنىڭ قارسى ايىپتاۋلارى دا تولاستاعان جوق. ەكى ەلدىڭ ليدەرى تەلەفوندا تايۋان تاقىرىبىن ءسوز ەتەتىن بولسا، كەيبىر ماسەلەلەر بويىنشا تاراپتار ورتاسىنداعى قارىم-قاتىناستار بەتبۇرىستى كۇيگە دە ءوتۋى عاجاپ ەمەس.

The Qazaq Times