قازاقستاندا بيىل قاڭتار مەن قاراشا ايى ارالىعىندا وبلىس دەڭگەيىندەگى 159 باسشى "جەمقورلىق قىلمىسى ءۇشىن" جاۋاپقا تارتىلعان. بۇل تۋرالى ورتالىق ازيا جاڭالىقتار قىزمەتى جازدى.

سىبايلاس جەمقورلىققا قارسى اگەنتتىك باسشىسى مارات احمەتجانوۆ 3 جەلتوقساندا ۆەدومستۆونىڭ جۇمىسى جونىندە پرەزيدەنت قاسىم-جومارت توقاەۆقا ەسەپ بەرگەن كەزدە وسىنداي مالىمەت ايتتى. بۇل جونىندە اقوردا سايتى حابارلادى.

احمەتجانوۆتىڭ ايتۋىنشا، "بيىل 11 ايدىڭ ىشىندە 1576 سىبايلاس جەمقورلىق قىلمىسى تىركەلگەن. 1280 ازامات، ونىڭ ىشىندە رەسپۋبليكالىق جانە وبلىستىق دەڭگەيدەگى 159 باسشى جەمقورلىق قىلمىس بويىنشا جاۋاپقا تارتىلعان. تالان-تاراجعا تۇسكەن 20 ميلليارد تەڭگەدەن استام قارجى بيۋدجەتكە قايتارىلعان".

رەسمي حابارلاماعا قاراعاندا، ۆەدومستۆو جەتەكشىسى پرەزيدەنتكە "اۋىل شارۋاشىلىعىن سۋبسيديالاۋعا جاسالعان كەشەندى ساراپتامالار، كولىك سالاسىنداعى جاعداي جانە قىلمىستىق ىستەر بويىنشا سوتقا دەيىنگى تەرگەپ-تەكسەرۋ قورىتىندىلارى" تۋرالى مالىمەت بەرگەن. ال توقاەۆ "سىبايلاس جەمقورلىققا قارسى كۇرەستىڭ جاڭا تاسىلدەرىن قولداعان". بىراق حابارلامادا ناقتى قانداي تاسىلدەر ەكەنى ايتىلماعان.

  • قازاقستاندا جەمقورلىق بويىنشا شەنەۋنىكتەر مەن مەملەكەتتىك قىزمەتكەرلەر ءجيى سوتتالادى، الايدا كوپ جاعدايدا ولار امنيستيامەن بوساتىلادى نەمەسە مەرزىمىنەن ەرتە بوستاندىققا شىعادى. سىنشىلار بيلىكتىڭ جەمقورلىقپەن كۇرەس شارالارىن ءتيىمسىز سانايدى.
  • Transparency International حالىقارالىق ۇيىمىنىڭ بيىل قاڭتاردا جاريالانعان جەمقورلىق يندەكسىندە قازاقستان 180 ەلدىڭ ىشىندە 94-ورىن العان.