بايدەن وكىلدەرى تايۋانعا بارىسىمەن قىتاي اسكەري جاتتىعۋ باستادى

اقش-تىڭ بىرقاتار بۇرىنعى لاۋازىمدى تۇلعالارى كەشە، 14 ءساۋىر تايۋانعا (تايۆان) ساپارلاي بارا سالىسىمەن، قىتاي اسكەري-تەڭىز كۇشتەرى تايۋان ارالىنىڭ وڭتۇستىك-باتىسىندا اسكەري جاتتىعۋ وتكىزەتىنىن جانە جاتتىعۋدا شىنايى وقتاردى پايدالاناتىنىن مالىمدەدى. بەيجىڭ بۇل ارەكەتى ارقىلى ۋاشينگتوننىڭ تايۋانعا بولعان قارىم-قاتىناسىنا نارازىلىعىن بىلدىرۋدە.

قىتاي جاعىنىڭ اسكەري جاتتىعۋىن گۋاڭدۇڭ (گۋاندۋن) تەڭىز قاۋىپسىزدىك باسقارماسى جاريا ەتتى. وڭتۇستىگى حاينان ارالىنان باستالىپ، سولتۇستىگى تايۋان بۇعازىنداعى پىڭ ارالىنا دەيىن اۋماقتى قامتيتىن اسكەري جاتتىعۋ بۇگىننەن باستاپ 5 كۇنگە جالعاسادى. ءار كۇنى تاڭعى 8-دەن، كەشكى 6-عا دەيىن جۇرگىزىلمەك.

گۋاڭدۇڭ تەڭىز قاۋىپسىزدىك باسقارماسى جاتتىعۋ تۋرالى مالىمدەدى. فوتو: Reuters.

قىتاي تارابى اسكەري جاتتىعۋ باستاۋدان ءبىر كۇن بۇرىن اقش-تىڭ بۇرىنعى سەناتورى كريس دودد جانە بۇرىنعى مەملەكەتتىك حاتشىنىڭ ورىنباسارلارى بولعان ريچارد ارميتاج بەن دجەيمس ستەينبەرگ باستاعان دەلەگاتسيا تايۋانداعى ساپارىن باستاعان. «رەسمي ەمەس» دەلىنگەن ساپاردى Reuters اگەنتتىگى «تايۋاننىڭ دەموكراتياسىن قولداۋعا دەگەن ادالدىعىن بىلدىرگەن بايدەننىڭ جەكە سيگنالى» دەپ باعالاعان.

تايۋان پرەزيدەنتىنىڭ ءباسپاسوز قىزمەتى جاساعان مالىمدەمەدە، پرەزيدەنت تساي يڭۆىن حانىم امەريكالىق «اعا دەلەگاتسيا وكىلدەرىمەن» بۇگىن ساعات 10-دا كەزدەسۋ وتكىزگەن.

اقش پەن قىتاي اراسىنداعى ارباسقان جاعدايدا تايۋان كۇننەن كۇنگە ماڭىزدى بولا تۇسۋدە. ەگەر ۋاشينگتون مەن بەيجىڭ قاتىناسى وسى كۇيدە ساقتالسا تايۋان اقش پەن قىتايدىڭ قاقتىعىس نۇكتەسىنە اينالاتىنى بۇعان دەيىن دە ايتىلىپ كەلگەن. دەمەك، تايۋانعا قاتىستى بۇنداي «ال قايتەسىڭ» اركەتتەر الداعى ۋاقىتتا دا قايتالانۋى مۇمكىن.

“The Qazaq Times”