شىڭجاڭداعى تۋىسىن قازاقستانعا قايتارۋدى تالاپ ەتىپ، ۇزاق ۋاقىتتان بەرى نارازىلىق وتكىزىپ جۇرگەن الماتى تۇرعىنى فاريدا قابىلبەكتىڭ كۇيەۋى زەينوللا راقىجان 9 ساۋىردە تاڭەرتەڭ قىتايدىڭ چەندۋ قالاسىنان الماتىعا ۇشىپ كەلدى. اۋەجايدا ونى وتىزعا جۋىق ادام كۇتىپ الدى. بۇل تۋرالى ازاتتىق راديوسى حابارلادى.
ازاتتىقتىڭ مالىمەتىنشە، راقىجاندى كەدەن قىزمەتىنىڭ وكىلدەرى ۇزاق ۇستاپ، جولاۋشىلاردىڭ سوڭىنان شىعارعان. بۇعان جۇرت نارازى بولعان. راقىجان جينالعان جۇرقا "ەلگە جەتكەنىمە قۋانىشتىمىن. ەكى ەلدىڭ دوستىعى ماڭگى جاساي بەرسىن. تۋىستارىڭ شىعادى. ۆيرۋس ۇستاپ تۇر. ءبارىڭنىڭ تۋىستارىڭدى جىبەرەدى" دەپ ايتقان.
راقىجان ازاتتىق ءجۋرناليسىنىڭ "سىزگە كەلەر الدىندا قىتاي تارابىنان قانداي دا ءبىر ەسكەرتۋ جاسالدى ما؟" دەگەن سۇراعىنا "جوق" دەپ جاۋاپ بەرگەن.
ازاتتىقتىڭ مالىمەتىنشە، 58 جاستاعى راقىجان زەينوللا قىتايدىڭ بورو-تالا-مونعول اۆتونوميالىق وبلىسىنىڭ اراسان اۋدانىنا قاراستى قارابۇقا كەنتىندە تۋىپ-وسكەن. 2000 جىلى وتباسىمەن بىرگە قازاقستانعا قونىس اۋدارىپ، الماتى وبلىسىنا كەلىپ تۇرعان. 2004 جىلى شىڭجاڭعا قىدىرىپ بارعان راقىجان زەينوللانى پوليتسيا ۇستاپ، جاۋاپقا تارتقان. تۋىستارىنىڭ ايتۋىنشا، "تىڭشى" دەگەن ايىپپەن 13 جىلعا سوتتاپ، تۇرمەگە قاماعان. تۇرمەدەن شىققان سوڭ ساياسي لاگەردە ءبىر جارىم جىل وتىرعان. قىتايدا دا، قازاقستاندا دا مەملەكەتتىك ورگانداردا قىزمەت ىستەمەگەن، تەك ۇساق ساۋدامەن اينالىسقان. ءبىر ۇل، ءبىر قىزى بار.
