ءسىزدىڭ دەنساۋلىعىڭىز سىزگە قانشالىقتى ماڭىزدى؟ ءوز دەنساۋلىعىڭىزعا قانشالىقتى كوڭىل بولەسىز؟ الماتى ايماقتىق كوپسالالى كلينيكانىڭ ماماندارى جۋرناليستەرگە ارناپ اشىق ەسىك كۇنىن وتكىزدى.

تۇركىتىلدەس جۋرناليستەر قورىنىڭ ۇيىمداستىرۋىمەن وتكىزىلگەن جيىننىڭ ماقساتى – ونكولوگيالىق اۋرۋلار ماسەلەسىنە قوعامنىڭ نازارىن اۋدارۋ، ونىڭ الدىن الۋ جانە ەرتە كەزەڭىندە انىقتاۋ، باق ارقىلى تۇرعىنداردى اقپاراتتاندىرۋ مەن سكرينينگتىك تەكسەرۋدىڭ قاجەتتىلىگىن ءتۇسىندىرۋ بولىپ تابىلادى. ءباسپاسوز ماسليحاتىندا العاشقى بولىپ ءسوز سويلەگەن اتالمىش كلينيكا ديرەكتورى، باس دارىگەر ولجاەۆ ساياحات تاۋربەكۇلى سكرينينگتەن ءوتۋدىڭ ماڭىزدىلىعىن ءتۇسىندىرىپ عانا قويماي، قاتەرلى ىسىكپەن اۋراتىندار ءۇشىن حالىق ەمىنىڭ قاۋىپتى ەكەنىن اتاپ ءوتتى.

مامانداردىڭ ايتۋىنشا، قازاقستاندا راك اۋرۋىنىڭ تارالۋ كورسەتكىشى بويىنشا ءبىرىنشى ورىندا ءسۇت بەزى، ەكىنشى ورىندا – وكپە وبىرى، ءۇشىنشى ورىندا تەرى وبىرى، ءتورتىنشى ورىندا اسقازان وبىرى، توق ىشەك جانە جاتىر موينى وبىرى تيىسىنشە 5-6 ورىندا تۇر. جالپى قاتەرلى ىسىك تۇرلەرىنىڭ كوبەيۋى جالعىز ءبىزدىڭ ەلىمىزگە عانا ەمەس، بۇكىلالەمدىك سيپاتقا يە. ال گينەكولوگيالىق قاتەرلى ىسىكتىڭ ەڭ ءجيى كەزدەسەتىن تۇرلەرى: جاتىر موينى وبىرى، انالىق بەز وبىرى ەكەن.
ونكولوگيالىق اۋرۋلاردىڭ الدىن الۋ ماقساتىندا اتقارىلىپ جاتقان جۇمىستارعا توقتالعان ونكولوگ ماماندار، تۇرعىنداردىڭ ءوز دەنساۋلىقتارىنا نەمقۇرايلى قارايتىندىقتارىن ايتىپ، دابىل قاعۋدا. «اۋرۋدى ەڭ باستاپقى ساتىسىندا انىقتاۋ جاقسى ناتيجە بەرەدى. بۇل ساتىدا ەمدەۋدىڭ ءتيىمدى جولدارىن قاراستىرۋعا بولادى. ناۋقاستىڭ دياگنوزى نەعۇرلىم باستاپقى ساتىسىندا انىقتالسا، ونىڭ قۇلان-تازا ايىعىپ كەتۋ مۇمكىندىگى دە سوعان بايلانىستى»،- دەيدى، الماتى ايماقتىق كوپسالالى كلينيكا ديرەكتورىنىڭ ورىنباسارى شالباەۆا راش شاريپبايقىزى.

دارىگەرلەر اتى جامان اۋرۋ جاھاندىق ماسەلە بولىپ كەلە جاتقاندىعىن جانە وعان نازار اۋدارۋ قاجەتتىگىن ەسكە سالادى. سوعان وراي، الماتى ايماقتىق كوپسالالى كلينيكاسىندا 25 قاڭتار اشىق ەسىك كۇنى بولاتىنىن حابارلايمىز.

مەكەن-جايى: الماتى قالاسى، دەمچەنكو كوشەسى، 83.

"The Qazaq Times"