قىتاي باسشىسى پيوڭياڭدا جىلى قارسى الۋعا بولەندى. فوتو: VOA.

قىتاي سولتۇستىك كورەياعا بولىستى. قىتاي باسشىسى اقش-تى سولتۇستىك كورەياعا قارسى سانكتسيالاردى جەڭىلدەتۋگە شاقىرعان.

قىتاي سىرتقى ىستەر مينيسترلىگىنىڭ كەشەگى مالىمدەمەسىندە، وساكادا وتكەن «ۇلكەن جيىرمالىق» سامميتىندە قىتاي باسشىسى شي جينپيڭ بەيجىڭنىڭ كورەي تۇبەگى ماسەلەسىنە قاتىستى ۇستانىمدارىن اقش پرەزيدەنتى دونالد ترامپقا تولىقتاي تانىستىرعانىن راستادى. قىتاي تارابى اقش-تان ماسەلەگە قاتىستى يكەمدىلىكتى ارتتىرۋ ءۇشىن سولتۇستىك كورەياعا بەلگىلى دەڭگەيدە مۇمكىندىكتەر بەرۋدى، سونىڭ ىشىندە، ەكونوميكالىق سانكتسيالاردى جەڭىلدەتۋدى ۇسىنعان. ديالوگ ارقىلى تۇسىنىستىكتى تەرەڭدەتۋدى ءوتىنىش ەتكەن.

سولتۇستىك كورەيا تالاي مارتە يادولىق جانە بالليستيكالىق زىمىران سىناقتارىن وتكىزدى. بۇۇ تارابىنان كحدر-نىڭ بۇل ارەكەتتەرىنە قارسى سانكتسيا ەنگىزىلگەن جانە وعان قىتاي دا قول قويعان بولاتىن. الايدا، بەيجىڭنىڭ مالىمەتىنە سەنسەك، قازىر سولتۇستىك كورەيا بەيبىتشىلىك كەلىسىمدەرى ءۇشىن جاقسى قادامدار جاساۋدا. سوندىقتان وعان جەڭىلدىكتەر بەرىلۋى كەرەك.

جاقىندا سولتۇستىك كورەيا باسشىسى كيم جوڭ ۋنمەن اقش جانە قىتاي باسشىلارى جەكە-جەكە كەزدەسكەن بولاتىن. قىتايدىڭ سولتۇستىك كورەيا ماسەلەسىنە بايلانىستى اقش-قا بۇنداي تالاپتاردى قويۋى قىتاي باسشىسىنىڭ پيوڭياڭداعى (پحەنيان)ساپارىنىڭ ناتيجەسى دەۋگە بولادى. قازىر، اقش پەن قىتاي اراسىنداعى ساۋدا سوعىسىنا بايلانىستى بەيجىڭ بيلىگى يران، سولتۇستىك كورەيا جانە وڭتۇستىك قىتاي تەڭىزى سەكىلدى ايماقتىق، جاھاندىق قاۋىپسىزدىككە قاتىستى ماسەلەلەردە كوبىرەك بوي كورسەتىپ جاتقانى بەلگىلى.

“The Qazaq Times”