فوتو: فيلمنەن ءۇزىندى

ۋكراينالىق تانىمال اكتەر، پروديۋسەر ۆلاديمير زەلەنسكي 2019 جىلى ناۋرىز ايىندا وتەتىن پرەزيدەنتتىك سايلاۋعا ءتۇسۋى مۇمكىن. ول قالىڭ كوپشىلىككە «سلۋگي نارودا» سەريالى ارقىلى تانىمال. اتالعان سەريالدا ول ۆاسيلي گولوبورودكو اتى-جونىمەن ۋكراينا پرەزيدەنتىنىڭ ءرولىن سومدايدى.

 سەريال جارىققا شىعىسىمەن كوپشىلىك ودان پرەزيدەنتتىك سايلاۋعا تۇسەتىنى تۋرالى سۇراي باستاعان. زەلەنسكي «بۇل ماسەلەگە قاتىستى انىق كوزقاراسىم بار دەپ ايتا المايمىن» قىسقاشا جاۋاپ قايىرعان.

«رەيتينگ» الەۋمەتتىك توبىنىڭ جۇرگىزگەن زەرتتەۋىنە سۇيەنسەك، زەلەنسكي قازىرگى اتاعىمەن سايلاۋدىڭ ەكىنشى تۋرىنا ەركىن وتەتىن كورىنەدى. ول قازىرگى پرەزيدەنت پەتر پوروشەنكومەن بىرگە 8 پايىز داۋىس جيناي الادى. بۇل تۇرعىدا ول 14 پايىز داۋىس جيناۋى مۇمكىن يۋليا تيموشەنكودان عانا قالىس قالۋى مۇمكىن. سونداي-اق تاعى ءبىر ۇمىتكەر سۆياتوسلاۆ ۆاكارچۋككە 4 پايىز عانا داۋىس بۇيىرۋى مۇمكىن ەكەن.

راس، زەلەنسكي ءوزىنىڭ سايلاۋعا تۇسەتىنى نەمەسە تۇسپەيتىنى تۋرالى ءالى اشىق ايتپادى. قالالاردا، اۋدانداردا ونىڭ سايلاۋ الدى كامپانياسى باستالعان جوق. جارناماسى دا ءجۇرىپ جاتقان جوق. بىراق اكتەر حالىق تاراپىنان قولداۋعا يە. ايتپاقشى، «سلۋگي نارودا» اتاۋىمەن ساياسي پارتيا دا تىركەلگەن. زەلەنسكي ونەر كورسەتەتىن «ستۋديا كۆارتال 95» جوباسىنىڭ جەتەكشىلەرىنىڭ ءبىرى يۆان باكانوۆ بۇل پارتيانى رەسمي تىركەۋگە ۇسىنعان.

وسى جىلدىڭ ءساۋىر ايىندا ۋكراينانىڭ ادىلەت مينيسترلىگى اتالعان پارتيانى تىركەپ، بۇل تۋرالى ءمينيستردىڭ ورىنباسارى ناتاليا بەرناتسكايا رەسمي مالىمدەگەن. جوعارعى رادا جۇرگىزگەن الەۋمەتتىك ساۋالناما بويىنشا پارلامەنتتىك سايلاۋعا جەتى ساياسي پارتيا قاتىسۋى مۇمكىن. ونىڭ قاتارىندا كوپ داۋىس جيناۋى مۇمكىن «سلۋگي نارودا» پارتياسى دا بار.

ال جوعارعى رادا دەپۋتاتى الەكسەي گونچارەنكو ەگەر زەلەنسكي پرەزيدەنتتىك سايلاۋعا قاتىساتىن بولسا وندا تەلەۆيزيالىق توك-شوۋعا كلوۋن وبرازىندا كەلۋگە ۋادە بەرگەن. بۇل تۋرالى «پەرشي» تەلەارناسىنىڭ ەفيرىنەن 23 جەلتوقسان كۇنى ايتتى.

«الەمدە ەشقانداي اكتەر تابىستى كينودان كەيىن بىردەن پرەزيدەنتتىك كرەسلوعا وتىرعان ەمەس. بۇل مەنىڭشە، زەلەنسكي كومانداسىنىڭ جارنامالىق جوباسى عانا. ءيا، اقش پرەزيدەنتى رونالد رەيگان اكتەر بولعان. بىراق ەل باسقارار الدىندا ول كاليفورنيانىڭ گۋبەرناتورى بولىپ جۇمىس ىستەدى» دەيدى دەپۋتات.

ەلدە جۇرگىزىلگەن الەۋمەتتىك ساۋالناما كورسەتكىشى بويىنشا – ەگەر سايلاۋ ەكىنشى تۋرعا جالعاسسا وندا زەلەنسكي «باتكيۆشينى» پارتياسىنىڭ كوشباسشىسى يۋليا تيموشەنكو مەن قازىرگى پرەزيدەنت پەتر پوروشەنكونى دا جەڭىپ كەتپەك.

كوپتىڭ نازارىن اۋدارعان زەلەنسكي 1978 جىلى 25 قاڭتاردا كريۆوي روگ قالاسىندا ومىرگە كەلگەن. كريۆورجسكي ەكونوميكالىق ينستيتۋتىن تامامداعان. ۇيلەنگەن. كەلىنشەگى ەلەنا زەلەنسكايا. الەكساندرا جانە كيريلل ەسىمدى بالالارى بار.

"The Qazaq Times"