فوتو: ارمەن ساركيسيان

"ارمەنيانىڭ ءتورتىنشى پرەزيدەنتى، ارمەن ساركيسيان دۇيسەنبى، 9 ءساۋىر كۇنى ارنايى ۇلتتىق جينالىستىڭ (پارلامەنت) ارنايى وتىرىسىنا قاتىستى»، - دەپ حابارلايدى ريا اقپاراتتىق اگەنتتىگى.

ۇلىقتاۋ راسىمىندە انت قابىلداعان ساركيسيان: «ارمەنيا زاڭىنا ادال بولۋعا انت ەتەمىن. ءوز مىندەتىمدى اتقارۋ بارىسىندا ءادىل ءارى بەيتاراپ بولۋعا، مەملەكەتتىك جانە ۇلتتىق مۇددەلەردى باسشىلىققا الىپ، بار كۇشىمدى ۇلتتىق بىرلىگىمىزدىڭ نىعايۋىنا جۇمساۋعا انت ەتەمىن» ، - دەدى.

ارمەنيا تاريحىندا العاش رەت مەملەكەت باسشىسى جالپىۇلتتىق سايلاۋ ارقىلى ەمەس، پارلامەنت دەپۋتاتتارى ارقىلى سايلاندى. مۇنداي ءراسىم 2015 جىلى ەلدىڭ پرەزيدەنتتىك باسقارۋدان پارلامەنتتىك باسقارۋ فورماسىنا ءوتۋىن بەكىتكەن كونستيتۋتسيالىق رەفورما ارقىلى قاراستىرىلعان. سايلاۋ 2 ناۋرىزدا وتكەن بولاتىن، وندا ساركيسيانعا 90 دەپۋتات داۋىس بەرگەن.

ءتورتىنشى پرەزيدەنت قىزمەتىنە كىرىسكەننەن كەيىن وتپەلى كەزەڭنىڭ قۇقىقتىق ءىس-شارالارى اياقتالىپ، ارمەنيا پارلامەنتتىك رەسپۋبليكاعا اينالدى. بۇدان بىلاي بيلىك پارلامەنت پەن ۇكىمەتتىڭ قولىنا ءوتىپ، ال پرەزيدەنت تەك ۋاكىلدىك مىندەت اتقارادى.

“The Qazaq Times”