فوتو عالامتور بەتتەرىنەن الىندى.

ليۆاننىڭ وسىدان ەكى اپتا بۇرىن قىزمەتىنەن باس تارتاتىنى جونىندە حابار تاراتقان پرەمەر-ءمينيسترى سااد حاريري وسى سەنبىدە فرانتسياعا ساپار شەگىپ، ەليسەي سارايىندا پرەزيدەنت ەمانۋەل ماكرونمەن كەزدەسەدى. وسىدان الدىن ليۆان پرەزيدەنتى 4 قاراشادا ريادقا اتتانعاننان بەرى ەلىنە ورالماعان پرەمەرى ءۇشىن الاڭداپ، ساۋد ارابياسى وعان قىسىم كورسەتىپ،  ەركىندىگىن شەكتەپ وتىر دەپ ايىپتاعان ەدى. ەندى ونىڭ بوستاندىعى وزىنە تيەسىلى ەكەنىن دالەلدەيتىن ساپار وڭىردە قالىپتاسقان كۇردەلى جاعدايلارعا جاڭا باعىت بەرۋى مۇمكىن. 

وسىعان دەيىن ريادتا سااد حاريريمەن ارنايى كەزدەسكەن فرانتسيانىڭ سىرتقى ىستەر ءمينيسترى ول پاريجگە رەسمي شاقىرتۋدى قابىل العانىن جاريالاعان بولاتىن. ساۋد ارابياسىنىڭ رەسمي وكىلدەرى دە ونىڭ ريادتا قالۋى ساياسي تۇلعانىڭ ءوز قالاۋىمەن شەشىلگەن دۇنيە ەكەنىن بىرنەشە رەت اتاپ ءوتتى.

سااد ءحاريريدىڭ فرانتسياعا باراتىنى تۋرالى حابارعا ليۆان پرەزيدەنتى ميشەل اۋن: "مەن ونىڭ بوستاندىعىنا قاۋىپ ءتونىپ تۇرعان جوق دەگەنگە سەنگىم كەلەدى. ول قالاي بولعان كۇندە دە، ليۆانعا كەلىپ، ءوز لاۋازىمىنان باس تارتاتىنىن رەسمي تۇردە راستاۋى كەرەك" دەپ جاۋاپ بەرىپ، ونىڭ ورنىنا جاقىن كۇندەرى جاڭا شەنەۋنىك تاعايىندالاتىنىن حابارلادى.

سااد حاريري بۇرىن بەرگەن سۇحباتتارىندا ليۆانعا ورالۋعا قورقاتىنىن ايتىپ، ساۋد ارابياسىنىڭ باستى جاۋى يران مەن ليۆان جانە يەمەندەگى قاقتىعىستاردىڭ نەگىزگى قاتىسۋشىسى "حەزبوللا" ۇيىمىن قاتاڭ سىنعا العان.

“The Qazaq Times”