فوتو: Euronews

يران-يراك شەكاراسىندا بولعان جەر سىلكىنىسىنەن قۇرباندار سانى 200-گە جەتتى. يراننىڭ توتەنشە جاعدايلار ءمينيسترى بەنام ءسايديدىڭ دەرەگىنە سايكەس، كەرمانشاش وڭىرىندە 207 ادام قازا تاۋىپ، 1 مىڭ 700 ادام جارالانعان. يراك باسشىلىعىنىڭ حابارلاۋىنشا، سۇلەيمانيا اۋماعىندا اپات سالدارىنان 6 ادام كوز جۇمىپ، 150 ازامات جارالانعان. بۇل تۋرالى APF اقپاراتتىق اگەنتتىگى جازدى. 

يران مەن يراك بيلىك وكىلدەرى جەر سىلكىنىسى بولعان اۋماقتارعا جولدىڭ جابىلۋىنا بايلانىستى كومەك جەتكىزۋ نە زارداپ شەككەن ازاماتتاردى ىزدەستىرۋ جۇمىستارى قيىنعا سوعىپ جاتقانىن ايتادى. IRNA اقپاراتتىق اگەنتتىگىنىڭ حابارلاۋىنشا، "قىزىل كرەست" ۇيىمىنىڭ 30 توبى اپات ورنىنا اتتانعان.

APF ءتىلشىسىنىڭ اقپاراتىنا سايكەس، ەپيتسەنترىنەن 25 كم قاشىقتىققا سوزىلعان جەر سىلكىنىسى باعدادتا 20 سەكۋندتاي بايقالىپ، وزگە وڭىرلەرگە تارالعان. يراندا اپات ەلدىڭ باتىس بولىگىندەگى قالالارعا اسەر ەتكەن. جەر سىلكىنىسى سونداي-اق تۇركيانىڭ وڭتۇستىك-شىعىس بولىگىندە دە بايقالعان. ديارباقىرداعى تۇرعىندار باسپانالارىن تاستاپ، ۋاقىتشا باسقا ورىندارعا قونىس اۋدارعانى تۋرالى اقپارات تارادى.

1990 جىلى كاسپيگە جاقىن ماڭدا بولعان 7,4 باللدىق جەر سىلكىنىسى يرانداعى ونداعان قالالار مەن 200-گە جۋىق اۋىلدى جەر بەتىنەن جويىپ، 40 مىڭ ادامنىڭ ولىمىنە سەبەپكەر بولعان ەدى. جۋىردا يران مەن تۇركمەنستان شەكاراسىندا بولعان تابيعي اپاتتان جۇزدەگەن ادام جارالانىپ، ەكى ازامات كوز جۇمعان.

“The Qazaq Times”