اقش كاتار داعدارىسىندا ەكى الىپ بيگە شىقتى

اراب ەلدەرى اراسىندا بولىپ جاتقان كاتار داعدارىسىنىڭ وڭ وزگەرىستەرى بايقالدى. كوپتەن بەرى ساۋد ارابياسى باستاعان ەلدەردىڭ كاتاردى بۇعاتتاۋىن قولداپ كەلگەن اقش ۇكىمەتى سوڭعى كەزدە كاتاردىڭ لەبىزىنە باس شۇلعىپ شىعا كەلدى.

21 شىلدە كۇنى اقش مەملەكەتتىك حاتشىسى تيللەرسون حابارلاما جاريالاپ، كاتاردىڭ تەرروريزمگە قارسى تۇرۋدا وڭ قادامدارعا بارعانىن، سوندىقتان ساۋد ارابياسى باستاعان ەلدەردىڭ كاتارعا سالعان سانكتسياسىنىڭ تەزىرەك كۇشى جويىلاتىنىنا ءۇمىت ەتەتىنىن ايتتى.

قىتايلىق «شينلاڭ» اقپاراتتىق اگەنتتىگىنىڭ رەسمي سايتىنىڭ حابارلاۋىنشا، تيللەرسون بۇل پىكىرىن وماننىڭ اقش-قا ساپارلاي بارعان ءسىم باسشىسى الابيمەن ۋاشينگتوندا وتكىزگەن ءباسپاسوز ماجىلىسىندە بىلدىرگەن. اقش پەن كاتار ەكى ەل جاقىندا تەرروريزمدى قارجىلاندىرۋعا قارسى ءىس-قيمىل جونىندەگى ءوزارا تۇسىنىستىك تۋرالى مەموراندۋمعا قول قويدى. سونىمەن كاتار جاعى ساۋد ارابياسى باستاعان ەلدەرمەن بولعان كەز-كەلگەن قايشىلىقتى، كاتار ەگەمەندىگىنە قۇرمەت ەتكەن جاعدايدا تولىقتاي كەلىسسوز ارقىلى شەشۋگە دايىن ەكەنىن مالىمدەگەن.

ەسكە سالا كەتەيىك:

• 5 ماۋسىم كۇنى ساۋد ارابياسى باستاعان اراب ەلدەرى كاتاردىڭ قۇرلىق، اۋە جانە سۋ جولدارىن كەسىپ، تۇبەكپەن بولعان بارلىق ديپلوماتيالىق قارىم-قاتىناسىن ۇزگەن;
• 23 ماۋسىم كۇنى ساۋد ارابياسى باستاعان ەلدەر كاتارعا 13 تارماقتى تالابىن جولداعان;
• 5 شىلدە كۇنى ءتورت ەلدىڭ 13 تارماقتى تالابىن كاتار جاعى تۇگەلدەي تەرىسكە شىعاردى;
• 11 شىلدە كۇنى كاتار مەن اقش ەكى ەل تەرروريزمدى قارجىلاندىرۋعا قارسى ءىس-قيمىل جونىندەگى ءوزارا تۇسىنىستىك تۋرالى مەموراندۋمعا قول قويدى.

“The Qazaq Times”