فوتو: استۆ

پاكىستان اسكەرلەرى ءۇندىستاننىڭ ەكى حابارلاسۋ بازاسىن تالقانداپ، 4 اسكەرىن اتىپ ءولتىردى. بۇل تۋرالى 10 شىلدە كۇنى تاڭەرتەڭ پاكىستان مەديالارى حابارلادى، دەپ جازادى اقش-تىڭ news.sinovision.net سايتى. وقيعا 9 شىلدە كۇنى بولعان.

پاكىستان ۇكىمەتى بۇدان ءبىر كۇن بۇرىن «ءۇندىستان اسكەرلەرى ەكى ەل اراسىنداعى شەكارا سىزىقتان اتتاپ كىردى» دەپ قاتاڭ ايىپتاپ ەسكەرتۋ جاساعان. سونداي-اق، ء"ۇندى ەلىنىڭ مۇنىسى اشىق اشكەرە وتارشىلدىق ارەكەت، ءبىز ءوز حالقىمىزدىڭ اماندىعى ءۇشىن وسى قادامعا باردىق" دەپ مالىمدەمە جاريالاعان.

وسى ەلدە تۇراتىن حالىقارالىق اپاتتى جاعدايلاردى باقىلاۋ مەكەمەسىنىڭ حابارىنا قاراعاندا، 2017 جىلدىڭ باسىنان بەرى وسى سەكىلدى قاقتىعىستاردان پاكىستان تەرريتورياسىنىڭ ىشىندە 18 ادام ءولىپ، 105 ادام جارالانعان ەكەن.

پاكىستان مەن ءۇندىستان اراسىندا ۇزاق جىلداردان بەرى شەشىلمەي كەلە جاتقان ءىرىلى-ۇساقتى قاقتىعىستار جەتەرلىك. دەسە دە، بۇل كورشى ەلدەردىڭ ءبىر-بىرىنە اشىق وق اتۋى، اسىرەسە، پاكىستان جاق "ەلىمىزدىڭ شەكاراسىنا باسىپ كىردى" دەپ قاتاڭ ايىپتاپ اسكەري قادامعا بارعانى، اتالمىش قايشىلىقتى ودان ارى ۇدەتەتىن باستاما بولۋى دا مۇمكىن. سەبەبى، پاكىستاننىڭ قىتايمەن وتە تاتۋ-ءتاتتى دوستىعىنىڭ تەرەڭدەگەنىن ەسكەرسەك، ەندىگى ماسەلە الپاۋىت ەلدەر اراسىندا تۋىنداماسىنا كىم كەپىل؟!

ادىلەت احمەتۇلى

 “The Qazaq Times”