تارازدا قاندى قاڭتار وقيعاسى بويىنشا ايىپتالعان 9 ادامنىڭ (ونىڭ ىشىندە 5 ادام وققا ۇشىپ قازا تاپقان) سوتى جالعاسىپ جاتىر. 26 قاڭتاردا ءجارىسسوز باستالعان بولاتىن.

27 قاڭتاردا وتكەن سوت وتىرىسىندا ءجارىسسوز جالعاستى. سوت پروتسەسى كۇدىكتى اسحات تاشەكەەۆتىڭ ادۆوكاتى وسپانوۆانى تىڭداۋدان باستالدى. ول تاشەكەەۆكە قر قك 272 بابىنىڭ 1 بولىگى بويىنشا تاعىلعان ايىپ قولدان جاسالعانىن ايتتى.

– اسحات تاشەكەەۆكە تاعىلعان 272 باپتىڭ 1 بولىگى بويىنشا تاعىلعان ايىپتىڭ قولدان جاسالعانى انىق كورىنىپ تۇر. مەملەكەتتىك ايىپتاۋشىلار تاشەكەەۆتىڭ جاپپاي تارتىپسىزدىك ۇيىمداستىرعانى جونىندە بىردە-ءبىر ماردىمدى دالەل كەلتىرگەن جوق. بارلىق كۋالار تاشەكەەۆتىڭ قولىندا ەشقانداي قارۋ بولماعانىن ايتتى. قاراپايىم، كافەل قويۋشى جىگىتتىڭ جاپپاي تارتىپسىزدىك ۇيىمداستىردى دەگەنگە كىم سەنەدى؟، – دەدى قورعاۋشى.

ادۆوكات تاشەكەەۆتى 272 باپتىڭ 1 بولىگىمەن تاعىلعان ايىپ بويىنشا اقتاۋدى، 272 باپتىڭ 3 بولىگىمەن تاعىلعان ايىپ بويىنشا باس بوستاندىعىنان ايىرماۋ جازاسىن بەرۋدى سۇرادى.

26 قاڭتاردا وتكەن سوت وتىرىسىندا تاشەكەەۆ تاعىلعان ايىپتى مويىندامايتىنىن ايتقان.

– كۋاگەرلەردىڭ بارلىعى جالعان. تاعىلعان ايىپتى مويىندامايمىن. بارلىعى وزدەرى وتىرماۋدىڭ (سوتتالماۋدىڭ) امالىن ىستەپ وتىر. قانشاما بالا قايتىس بولدى. ولاردىڭ بارلىعى ادىلدىك ىزدەپ وتىر. بىزدە سول ادىلدىك بولسىن دەيمىز... پروكۋرورلار ماعان ءتورت جىل بەرۋدى سۇراپ جاتىر ەكەن. بەرسە، بەرەر، وتىرسام، وتىرارمىن. اناما عانا قيىن. وسى جەردە انام عانا قينالىپ وتىر، – دەدى ول.

تاشەكەەۆ سوتتا ىسكە قاتىسۋشىلاردان ۋاقىتتارىن العانىنا كەشىرىم سۇراپ، قاسىندا وتىرعان مارات بەكباۋدىڭ ء(ىس بويىنشا كۇدىكتى دەپ تانىلعان) باسىنان يىسكەپ: «بەكباۋدىڭ باسىنان يىسكەسەم كىمنىڭ ءيىسى شىعادى، قازاقتىڭ ءيىسى شىعادى» دەپ، سوتتان ءوزىن اقتاۋدى سۇراعان.

سوتتالۋشى نۇربول ەرەجەپوۆتىڭ ادۆوكاتى سۋديادان كۇدىكتىنى تولىقتاي اقتاۋدى سۇرادى. ول تاعىلعان ايىپتار دالەلىن تاپپادى دەدى.

قاڭتار وقيعاسى كەزىندە وققا ۇشىپ، قازا تاپقان سوتتالۋشى يساتاي دونباەۆتىڭ اپايى شولپان دونباەۆا دا باۋىرىنا تاعىلعان ايىپپەن كەلىسپەيتىنىن ايتىپ، اقتاۋدى سۇرادى.

مارات بەكباۋ ەشكىمدى ايداپ سالىپ، ءورت قويۋعا قاتىسپاعانىن، وزىنە تاعىلعان ايىپپەن كەلىسپەيتىنىن ايتتى. ول سوتتان باس بوستاندىعىنان ايىرماۋدى سۇرادى.

ەرجان بايجانوۆتىڭ اناسى نيگورا زاكارياەۆا ۇلىنا تاعىلعان ايىپپەن كەلىسپەيتىنىن، بالاسىنىڭ كىسى قولىنان اسقان زورلىقپەن ولتىرىلگەنىن ايتتى.

– مەن ۇلىمنىڭ كىسى قولىنان اسقان زورلىقپەن ولتىرىلگەننەن كەيىن تاعىلعان ايىپپەن كەلىسپەيمىن. ۇلىم ءبىر جىل، جيىرما كۇننەن استام ۋاقىتتان بەرى جەر استىندا جاتىر. ول سويلەۋ قۇقىعىنان ايىرىلعان. اناسى مەن، ۇلىم ءۇشىن بارىنشا جاۋابىمدى ايتامىن... قۇرمەتتى سوت مىرزا، سىزدەن ءوتىنىپ سۇرايمىن، قايتىس بولعان مارقۇمداردى اقتاپ، جاسالماعان قىلمىسى ءۇشىن كىنالى قىلىپ جىبەرمەڭىز! ءبىز ءادىل سوتتىڭ شەشىمىن كۇتىپ وتىرمىز، – دەدى ول.

ءجارىسسوز كەزىندە سوتتالۋشىلار، ولاردىڭ تۋىستارى مەن ادۆوكاتتارى ىستە شيكىلىكتەر كوپ ەكەنىن كەزەك-كەزەك ايتتى. سوت اياقتالعاننان سوڭ باق وكىلدەرى پروكۋرور ادىلەت ۇسەمباەۆتان وسىعان بايلانىستى پىكىر ءبىلدىرۋىن سۇرادى. بىراق ول جۋرناليستەردەن قاشقاقتاپ، ءجۇرىپ كەلە جاتىپ جاۋاپ بەردى. ول ىسكە بايلانىستى سوتتان تىس پىكىر بىلدىرۋگە قۇقىعى جوق ەكەنىن ايتتى.

– مەن بۇل جەردە ىسكە مەملەكەتتىك ايىپتاۋشى رەتىندە قاتىسىپ جاتىرمىن. بىراق، ىسكە رەسمي وكىل رەتىندە پىكىر بەرۋگە ەشكىم وكىلەتتىك بەرگەن جوق. مەن بارلىعىن جارىسسوزدە ايتتىم. جاۋاپ قاجەت بولسا وبلىستىق پروكۋراتۋرادان سۇراڭىزدار، – دەپ قىسقا قايىردى پروكۋرور.

سۋديا باعدات تورەبەكۇلى سوتتالۋشىلارعا كەلەسى سوت وتىرىسىن 30 قاڭتارعا بەلگىلەردى. كەلەسى سوت وتىرىسىندا سوتتالۋشىلار سوڭعى سوزدەرىن ايتادى.

قاندى قاڭتار وقيعاسى كەزىندە تاراز قالاسىندا رەسمي دەرەك بويىنشا 15 ادام قازا تاپقان. بىراق

قاڭتار وقيعاسىنا قاتىسۋشىلار مەن ولاردىڭ تۋىستارى وققا ۇشىپ، مەرت بولعانداردىڭ سانى ودان الدە قايدا كوپ ەكەنىن ايتقان.