19 قاڭتاردا اقوردادا بارلىق دەڭگەيدەگى ءماسليحات وكىلەتىن توقتاتۋ جانە ءماجىلىستى تاراتۋ مەن كەزەكتەن تىس ءماجىلىس سايلاۋىن تاعايىنداۋ تۋرالى جارلىقتى جاريالادى.
اقوردانىڭ رەسمي سايتىندا جاريالانعان حابارلامادا توقاەۆ ءماجىلىس دەپۋتاتتارىنىڭ 70 پايىزى پارتيالىق ءتىزىم ارقىلى، ال قالعان 30 پايىزى ءبىر مانداتتى وكرۋگتەردەن سايلاناتىنى جونىندە ايتقان.
– وبلىستار مەن رەسپۋبليكالىق ماڭىزى بار قالالارداعى ءماسليحات دەپۋتاتتارى دا ارالاس جۇيە بويىنشا سايلانادى. دەپۋتاتتاردىڭ 50 پايىزى ءبىر مانداتتىق جۇيە ارقىلى، 50 پايىزى پارتيالىق ءتىزىم بويىنشا وتەدى. ال اۋدان جانە وبلىستىق ماڭىزى بار قالالارداعى ءماسليحات سايلاۋىندا ازاماتتار ءبىر مانداتتى وكرۋگتەردەن شىققان كانديداتتارعا داۋىس بەرەدى. وسىلايشا، ءماجىلىس پەن ءماسليحاتتار جاڭا ۇلگى بويىنشا جاساقتالادى, – دەدى توقاەۆ.
ول سونىمەن بىرگە پارتيانى تىركەۋگە قاجەت ادامدار سانى 20 مىڭنان 5 مىڭعا دەيىن ازايتىلعانىن جانە وزگە دە «شارتتار جەڭىلدەتىلگەنىن» اتاپ ءوتىپ، ەلدە «العاش رەت كوپ ۋاقىتتان بەرى بىرنەشە جاڭا ساياسي پارتيا» تىركەلدى دەپ مالىمدەدى.
توقاەۆ سايلاۋ بيۋللەتەنىنە «بارىنە قارسىمىن» گرافاسى ەنگىزىلگەنىن، پارتيالاردىڭ ماجىلىسكە وتۋىنە قاجەت مەجەنىڭ 7-دەن 5-كە تومەندەتىلگەنىن العا تارتىپ، سوڭعىسىن «دەموكراتيالاندىرۋ جولىنداعى ايرىقشا ءمانى بار قادام» دەپ اتادى.
ول سايلاۋدىڭ زاڭعا سايكەس ءوتۋى قاتاڭ قاداعالانادى، بۇعان وسك مەن باس پروكۋراتۋرا جاۋاپتى دەدى. سايلاۋدى جەرگىلىكتى جانە حالىقارالىق باقىلاۋشىلار باقىلايدى دەدى.
سايلاۋ تۋرالى زاڭعا سايكەس، ەلدە كەزەكتەن تىس پارلامەنت سايلاۋىن پرەزيدەنت تاعايىندايدى. پارلامەنت نەمەسە ءماجىلىس وكىلەتىن توقتاتۋ تۋرالى شەشىمدى دە سول قابىلدايدى. سايلاۋ ءماجىلىس نەمەسە پارلامەنت وكىلەتى توقتاتىلعان مەزگىلدەن ەكى اي ىشىندە ءوتۋى ءتيىس.
ساراپشىلار بيلىك «ساياسي پارتيالاردى تىركەۋدى جەڭىلدەتىپ، ماجىلىسكە ءوتۋ شەگىن قىسقارتتىق» دەپ مالىمدەگەنمەن ونىڭ ءبارى «كوسمەتيكالىق سىلاپ-سيپاۋ عانا», شىنايى رەفورما جۇرگىزىلگەن جوق دەپ سانايدى.
